પોર્ટ ઓફ સ્પેન — તા.૦૩ ક્વીન્સ પાર્ક ઓવલ ખાતે પાકિસ્તાન સામે શરૂ થયેલી પ્રથમ ટેસ્ટ મેચના પ્રથમ દિવસે જ સ્પિનરોને મદદ કરતી પીચ પર વેસ્ટ ઈન્ડિઝે મજબૂત સ્થિતિ પ્રાપ્ત કરી લીધી છે. વરસાદ અને ખરાબ પ્રકાશના કારણે સમયસર રમત રોકવી પડી તે પહેલાં વેસ્ટ ઈન્ડિઝે ૫ વિકેટના ભોગે ૨૩૯ રન બનાવી લીધા હતા. કેરેબિયન ટીમ માટે મધ્યક્રમના બેટ્સમેન જસ્ટિન ગ્રીવ્સે શાનદાર બેટિંગ કરાતાં અણનમ ૬૪ રન બનાવ્યા હતા અને છઠ્ઠી વિકેટ માટે રોસ્ટન ચેઝ સાથે ૬૬ રનની અણનમ ભાગીદારી નોંધાવી હતી.
મેચની શરૂઆત પહેલાં પાકિસ્તાનની પ્લેઈંગ ઈલેવનમાંથી અનુભવી ઝડપી બોલર મોહમ્મદ અબ્બાસની આશ્ચર્યજનક ગેરહાજરી ચર્ચાનો વિષય બની હતી. વેસ્ટ ઈન્ડિઝના ઓપનરોએ આ તકનો પૂરો લાભ ઉઠાવ્યો હતો અને ઝડપી રન ઉમેર્યા હતા. જોકે, વરસાદને કારણે લંચ વહેલું લેવું પડ્યું તે પહેલા મોહમ્મદ અલીએ ટેગેનરાઇન ચંદ્રપોલને આઉટ કરીને પાકિસ્તાનને પ્રથમ સફળતા અપાવી હતી. ત્યારબાદ રમત ફરી શરૂ થતાં જ અલી ઉસ્માન અને સાજિદ ખાનની સ્પિન જોડીએ સપાટી પરથી મળતા ટર્નનો લાભ ઉઠાવીને બ્રાન્ડન કિંગ (૪૬) અને કેવેમ હોજને આઉટ કરીને વેસ્ટ ઈન્ડિઝ પર દબાણ વધાર્યું હતું.
મધ્યક્રમમાં શાઈ હોપ અને આમિર જાંગુએ સંયમપૂર્વક રમીને ઇનિંગ્સને સંભાળવાનો પ્રયાસ કર્યો હતો, પરંતુ ડેબ્યુટન્ટ બોલર ઉબેદ શાહ અને મોહમ્મદ અલીએ વિકેટો ઝડપીને પાકિસ્તાન માટે વાપસીનો માર્ગ ખોલ્યો હતો. શાઈ હોપ ૨૯ રને બોલ્ડ થતાં વેસ્ટ ઈન્ડિઝે ૨૩૯ રન સુધી પહોંચતા ૫ વિકેટ ગુમાવી દીધી હતી.
અંતિમ સત્રમાં જસ્ટિન ગ્રીવ્સે આક્રમક વલણ અપનાવ્યું હતું અને કવર ડ્રાઈવ્સ દ્વારા પાકિસ્તાની ઝડપી બોલરો તથા સ્પિનરો સામે સતત બાઉન્ડ્રીઓ ફટકારી હતી. દિવસની લગભગ ૧૬ ઓવરો ખરાબ પ્રકાશના કારણે ફેંકી શકાઈ નહોતી, પરંતુ રમતના અંતે વેસ્ટ ઈન્ડિઝે સ્પિન અનુકૂળ વિકેટ પર પાકિસ્તાન સામે પોતાની સ્થિતિ મજબૂત બનાવી લીધી છે.