ભારતના પૂર્વ દિગ્ગજ ક્રિકેટર વીરેન્દ્ર સહેવાગના પુત્ર આર્યવીર સહેવાગે અંડર-19 એશિયા કપ 2026માં શાનદાર બેટિંગ કરીને સૌનું ધ્યાન ખેંચ્યું છે. UAE સામેની મેચમાં આર્યવીરે 131 બોલમાં અણનમ સદી ફટકારી પિતાની આક્રમક બેટિંગની યાદ અપાવી છે.

અંડર-19 એશિયા કપ 2026ના ગ્રુપ-Aની 11મી મેચમાં ભારતીય જુનિયર ટીમના ઓપનર આર્યવીર સહેવાગે શાનદાર બેટિંગનું પ્રદર્શન કર્યું છે. UAE અંડર-19 સામે રમાઈ રહેલી આ મેચમાં ભારતના પૂર્વ વિસ્ફોટક બેટર વીરેન્દ્ર સહેવાગના પુત્ર આર્યવીરે પોતાની પ્રતિભા સાબિત કરી છે. તેણે 131 બોલમાં શાનદાર સદી ફટકારીને ભારતીય ટીમને મજબૂત સ્થિતિમાં પહોંચાડી છે.

મેચમાં UAE ના કેપ્ટને ટોસ જીતીને પ્રથમ બેટિંગ માટે ભારતીય ટીમને આમંત્રણ આપ્યું હતું. પીચ પર ખાસ ઉછાળો નહોતો અને બોલ પણ નીચો રહેતો હતો. શરૂઆતમાં UAE ના ફાસ્ટ બોલરોએ શિસ્તબદ્ધ બોલિંગ કરીને ભારતીય ઓપનરોને રન બનાવવા માટે સંઘર્ષ કરાવ્યો હતો. ભારતીય ટીમના કેપ્ટન લક્ષ્ય રાયચંદાની 17 રન બનાવીને 14 મી ઓવરમાં નૂરુલ્લાહ અયુબીએ આઉટ કર્યા હતા. જોકે, કેપ્ટનની વિકેટ પડ્યા બાદ પણ આર્યવીરે પોતાની એકાગ્રતા જાળવી રાખી હતી. તેણે સ્પિન બોલરો સામે પગનો શાનદાર ઉપયોગ કરીને આક્રમક શોટ્સ રમ્યા હતા. કવર અને મિડવિકેટની દિશામાં તેણે અનેક આકર્ષક બાઉન્ડ્રી ફટકારી હતી.

શરૂઆતમાં સાવચેતીપૂર્વક બેટિંગ કર્યા બાદ પીચ પર સેટ થતાં જ આર્યવીરે પોતાની બેટિંગની અસલી તાકાત બતાવી હતી. તેના શોટ્સમાં પિતા વીરેન્દ્ર સહેવાગની આક્રમક બેટિંગની ઝલક જોવા મળી હતી. નૂરુલ્લાહ અયુબીની એક જ ઓવરમાં સતત બે ચોગ્ગા ફટકારીને તેણે પોતાના ઇરાદા સ્પષ્ટ કરી દીધા હતા. આર્યવીરે 131 બોલમાં 76.34 ના સ્ટ્રાઇક રેટથી અણનમ 100 રન બનાવ્યા હતા. તેની આ સદીમાં 13 ચોગ્ગા અને બે ગગનચુંબી છગ્ગાનો સમાવેશ થાય છે. મુશ્કેલ પરિસ્થિતિમાં લાંબી ઇનિંગ રમીને તેણે પોતાની બેટિંગ ક્ષમતાનો પરિચય આપ્યો છે.

બીજી તરફ આર્યવીરને બીજા છેડેથી વીકે વિનીતનો સારો સાથ મળ્યો હતો. વિનીતે 40 બોલમાં એક ચોગ્ગા અને એક છગ્ગાની મદદથી અણનમ 29 રન બનાવ્યા હતા. બંને બેટરોએ સંયમપૂર્વક બેટિંગ કરીને ભારતીય ટીમને મોટા સ્કોર તરફ આગળ વધારી હતી. મળતી માહિતી મુજબ, ભારતે 33.5 ઓવરમાં એક વિકેટના નુકસાન પર 159 રન બનાવી લીધા હતા. આર્યવીરની શાનદાર સદીના કારણે ભારતીય ટીમ મજબૂત સ્થિતિમાં પહોંચી હતી.