ગુવાહાટી,: ક્રિકેટ જગતમાં અત્યારે એક જ નામની ગુંજ સંભળાઈ રહી છે - વૈભવ સૂર્યવંશી. ગુવાહાટી ખાતે રમાયેલી રોયલ ચેલેન્જર્સ બેંગલુરુ (RCB) વિરુદ્ધની મેચમાં રાજસ્થાન રોયલ્સના આ 15 વર્ષીય ઓપનરે એવી બેટિંગ કરી કે જાણે કોઈ વીડિયો ગેમ રમી રહ્યો હોય. વિશ્વના શ્રેષ્ઠ બોલરોમાં ગણાતા જોશ હેઝલવુડ અને ભુવનેશ્વર કુમારની લાઇન-લેન્થ બગાડતા વૈભવે માત્ર 26 બોલમાં 78 રન ઝૂડી કાઢ્યા હતા.
દિગ્ગજ બોલરોનો સંહાર
વૈભવે પોતાની ઇનિંગ દરમિયાન બોલરની પ્રતિષ્ઠાની જરાય પરવા કરી નહોતી. હેઝલવુડની બીજી જ ઓવરમાં તેણે સતત ચાર બાઉન્ડ્રી ફટકારીને સ્ટેડિયમમાં રહેલા દર્શકોને મંત્રમુગ્ધ કરી દીધા હતા. એટલું જ નહીં, સ્વિંગના કિંગ ગણાતા ભુવનેશ્વર કુમારને પણ તેણે સતત બે છગ્ગા ફટકારીને દબાણમાં મૂકી દીધા હતા. આ ટુર્નામેન્ટમાં તેણે બીજી વખત માત્ર 15 બોલમાં અર્ધસદી પૂરી કરવાનો કરિશ્મો કર્યો છે. બિહારના આ લાલને આખરે 9મી ઓવરમાં કૃણાલ પંડ્યાએ આઉટ કર્યો હતો, પરંતુ ત્યાં સુધીમાં તેણે RR માટે જીતનો પાયો નાખી દીધો હતો.
સંજુ સેમસનનો ‘યલો આર્મી’માં સિંહફાળો
બીજી તરફ, ચેન્નાઈ સુપર કિંગ્સ (CSK) ના નવા સભ્ય સંજુ સેમસને દિલ્હી કેપિટલ્સ સામે ઐતિહાસિક સદી ફટકારીને ટીકાકારોના મોઢા બંધ કરી દીધા છે. સંજુ IPL 2026 નો પ્રથમ સદી ફટકારનાર ખેલાડી બન્યો છે. તેણે અણનમ 115 રન બનાવીને ટીમને 212 રનના વિશાળ સ્કોર સુધી પહોંચાડી હતી. આ ઇનિંગ દરમિયાન સંજુએ T20 ક્રિકેટમાં પોતાની 400 સિક્સર પણ પૂર્ણ કરી, અને રોહિત શર્મા તથા વિરાટ કોહલી જેવી એલિટ યાદીમાં સ્થાન મેળવ્યું છે.
ગાયકવાડ પર ઉઠ્યા સવાલ, IPL vs PSL ની ચર્ચા તેજ
મેદાન પર જ્યારે સંજુ સેમસન તોફાની બેટિંગ કરી રહ્યો હતો, ત્યારે CSK ના કેપ્ટન રુતુરાજ ગાયકવાડ રન બનાવવા માટે સંઘર્ષ કરતા જોવા મળ્યા હતા. સોશિયલ મીડિયા પર ચાહકોએ રુતુરાજની ધીમી બેટિંગની ટીકા કરી અને સંજુને સંપૂર્ણ રીતે ‘બેટન’ સોંપવાની માંગ કરી છે.
દરમિયાન, દક્ષિણ આફ્રિકાના બેટ્સમેન રાયલી રોસોઉએ IPL અને PSL વચ્ચેની સરખામણી કરીને વિવાદ છેડ્યો છે. તેણે કહ્યું કે IPL બોલિવૂડના સમર્થનને કારણે "વાસ્તવિક ક્રિકેટ કરતાં ફિલ્મ જેવી વધુ લાગે છે", જ્યારે PSL માં વધુ ઉગ્ર સ્પર્ધા હોય છે. જોકે, ભારતીય ચાહકોએ સોશિયલ મીડિયા પર આ ટિપ્પણીનો જડબાતોડ જવાબ આપતા કહ્યું છે કે IPL ની ગુણવત્તા અને સ્તર સાથે કોઈની તુલના શક્ય નથી.
ભારતીય T20 ટીમમાં અત્યારે ઓપનિંગ જોડી માટે વૈભવ સૂર્યવંશી, સંજુ સેમસન, અભિષેક શર્મા અને યશસ્વી જયસ્વાલ જેવા પ્રતિભાશાળી ખેલાડીઓ વચ્ચે જબરદસ્ત સ્પર્ધા જોવા મળી રહી છે, જે ભારતીય ક્રિકેટના ઉજ્જવળ ભવિષ્યનો સંકેત છે.