ઇન્ડિયન પ્રીમિયર લીગની 19મી સીઝનમાં ડાબોડી ઓપનિંગ બેટ્સમેન વૈભવ સૂર્યવંશી દરેક મેચ સાથે નવા રેકોર્ડ બનાવી રહ્યો છે. ગુજરાત ટાઇટન્સ સામે ક્વોલિફાયર 2 મેચમાં પણ આવી જ સિદ્ધિ જોવા મળી. ન્યુ ચંદીગઢના મુલ્લાનપુર સ્ટેડિયમમાં રમાઈ રહેલી મેચમાં રાજસ્થાન રોયલ્સે ટોસ જીતીને પહેલા બેટિંગ કરવાનો નિર્ણય લીધો. જ્યારે તેમની ઇનિંગ્સની શરૂઆત સારી ન હતી, ત્યારે વૈભવ સૂર્યવંશીએ એક છેડો પકડી રાખ્યો અને 20 રનનો આંકડો પાર કર્યો આ સાથે જ એવું કારનામું કર્યું જે  IPL ઇતિહાસમાં અગાઉ કોઈ અનકેપ્ડ ખેલાડીએ હાંસલ કરી શક્યો નથી.    

IPLના 19 વર્ષના ઇતિહાસમાં કોઈ પણ ખેલાડીએ એક જ સીઝનમાં વૈભવ સૂર્યવંશીના રેકોર્ડ જેટલા રેકોર્ડ તોડ્યા નથી. જ્યારે વૈભવ સૂર્યવંશીએ પહેલાથી જ એક જ સીઝનમાં અનકેપ્ડ ખેલાડી તરીકે સૌથી વધુ રન બનાવવાનો રેકોર્ડ પોતાના નામે કર્યો છે, ત્યારે તેણે હવે IPLમાં એક જ સીઝનમાં 700 કે તેથી વધુ રન બનાવનાર પ્રથમ અનકેપ્ડ ખેલાડી બનીને વધુ એક મહત્વપૂર્ણ સિદ્ધિ હાંસલ કરી છે. તે એક જ સિઝનમાં 700 કે તેથી વધુ રન બનાવનાર માત્ર પાંચમો ભારતીય ખેલાડી છે. વિરાટ કોહલીએ આ સિદ્ધિ બે વાર હાંસલ કરી છે, જ્યારે સાઈ સુદર્શન, સૂર્યકુમાર યાદવ અને શુભમન ગિલે એક-એક વાર આ સિદ્ધિ મેળવી છે.

વૈભવ સૂર્યવંશીની બેટિંગમાં ચોગ્ગા અને છગ્ગાનો વરસાદ થાય છે અને તે પહેલાથી જ પાવરપ્લેમાં એક જ IPL સિઝનમાં સૌથી વધુ રન બનાવવાનો રેકોર્ડ ધરાવે છે. ગુજરાત ટાઇટન્સ સામેની ક્વોલિફાયર 2 મેચમાં વૈભવે પ્રથમ છ ઓવરમાં કુલ 31 રન બનાવ્યા જેનાથી તે IPL ઇતિહાસમાં પાવરપ્લેમાં 500 થી વધુ રન બનાવનાર પ્રથમ ખેલાડી બન્યો. વૈભવ સૂર્યવંશીએ 2026 IPL સિઝનમાં પાવરપ્લેમાં કુલ 521 રન બનાવ્યા છે.