ન્યુ યોર્ક : યુએસ ઓપન ૨૦૨૬ દરમિયાન લુઈ આર્મસ્ટ્રોન્ગ સ્ટેડિયમમાં રમાયેલી ચોથા રાઉન્ડની મેચમાં વિશ્વની નંબર-૧ ટેનિસ ખેલાડી અને બે વખતની ડિફેન્ડિંગ ચેમ્પિયન આર્યના સબાલેન્કાએ ઉઝબેકિસ્તાનની કામિલા રાખિમોવા સામે વિજય મેળવતા અગાઉ અચાનક કોર્ટ પર ફેલાયેલી ગાંજાની તીવ્ર ગંધ અને વિચિત્ર પડકારનો સામનો કરવો પડ્યો હતો. મેચની ત્રીજી ગેમમાં જ્યારે સબાલેન્કા સર્વિસ કરવા માટે તૈયાર થઈ રહી હતી ત્યારે હવામાં ડ્રગ્સ અથવા ગાંજા જેવી ઉગ્ર વાસ આવવાને કારણે તેણે અચાનક અટકી જવું પડ્યું હતું અને તાત્કાલિક મેચ અમ્પાયર પાસે જઈને આ ગંભીર બાબતની ફરિયાદ નોંધાવી હતી.

આ અણધારી ઘટના બાદ મેચ પૂર્ણ થયા પછી પત્રકારો સાથે વાતચીત કરતા સબાલેન્કાએ હસતા હસતા રમૂજી અંદાજમાં જણાવ્યું હતું કે, "તમે ઈચ્છો તેટલો આરામ કરી શકો છો, પરંતુ મહેરબાની કરીને કોર્ટની આસપાસ આવી ગતિવિધિઓ ન કરો કારણ કે ખેલાડી તરીકે સર્વશ્રેષ્ઠ પ્રદર્શન કરતી વખતે આવી તીવ્ર ગંધ સહન કરવી ખૂબ જ મુશ્કેલ બને છે." પ્રેસ કોન્ફરન્સમાં જ્યારે એક પત્રકારે તેના હાઈ લેવલ અથવા માનસિક સ્થિતિ વિશે સવાલ કર્યો ત્યારે તેણે હસતાં હસતાં ઉમેર્યું હતું કે જો કોઈ આ રીતે ટેનિસ કોર્ટની આસપાસ સ્મોક કરતું રહેશે તો તેને પણ વગર નશાએ હાઈ લેવલ અનુભવાવા લાગશે.

તમામ મુશ્કેલીઓ અને અડચણોને પાર કરીને સબાલેન્કાએ શાનદાર રમતનું પ્રદર્શન જારી રાખ્યું હતું અને ૫૪ મિનિટ સુધી ચાલેલા તીવ્ર સંઘર્ષ બાદ રાખિમોવાને ૬-૩, ૬-૪ ના સીધા સેટોમાં હરાવીને આગલા રાઉન્ડમાં પ્રવેશ મેળવ્યો હતો. અમેરિકાની જેસિકા પેગુલા પણ આ ટૂર્નામેન્ટમાં પોતાના હોમ ગ્રાન્ડ સ્લેમના બીજા સપ્તાહમાં સતત પાંચમા વર્ષે પહોંચવામાં સફળ રહી છે, જ્યારે સેરેના વિલિયમ્સ પછી સતત ત્રણ યુએસ ઓપન ટાઈટલ જીતનાર પ્રથમ ખેલાડી બનવાના લક્ષ્ય સાથે મેદાનમાં ઉતરેલી સબાલેન્કાનો મુકાબલો હવે આગામી તબક્કામાં અમેરિકાની ટેલર ટાઉનસેન્ડ સામે થશે.

ગ્રાન્ડ સ્લેમ જેવી પ્રતિષ્ઠિત આંતરરાષ્ટ્રીય સ્પર્ધાઓ દરમિયાન સ્ટેડિયમ પરિસરમાં આ પ્રકારની નશાકારક પદાર્થોની ગંધ આવવાની ઘટનાઓએ ફરી એકવાર ટુર્નામેન્ટની સુરક્ષા અને આસપાસના નિયમો પર ગંભીર સવાલો ઊભા કર્યા છે. આગામી સમયમાં આ પ્રકારની ઘટનાઓનું પુનરાવર્તન ન થાય તે માટે આયોજકો અને સુરક્ષા એજન્સીઓ દ્વારા સ્ટેડિયમની ગેલેરીઓ અને આસપાસના વિસ્તારોમાં ચેકિંગ વધુ સઘન બનાવવામાં આવે તેવી પૂરી શક્યતા છે.