લોસ એન્જલસ : અમેરિકા, મેક્સિકો અને કેનેડાની સંયુક્ત યજમાનીમાં રમાઈ રહેલા ફિફા (FIFA) ફૂટબોલ વર્લ્ડ કપ ૨૦૨૬માં સ્પેનિશ ટીમે પોતાનું વિજયી અભિયાન જારી રાખતા પ્રી-ક્વાર્ટર ફાઇનલ (રાઉન્ડ ઓફ ૧૬)માં સ્થાન પાકું કરી લીધું છે. કેલિફોર્નિયાના ઇંગલવુડ સ્થિત પ્રતિષ્ઠિત લોસ એન્જલસ સ્ટેડિયમ ખાતે રમાયેલી રોમાંચક અને હાઈ-વોલ્ટેજ 'રાઉન્ડ ઓફ ૩૨' ની નોકઆઉટ મેચમાં સ્પેને શાનદાર પ્રદર્શન કરતા ઓસ્ટ્રિયાની ટીમને ૩-૦ ના મોટા માર્જિનથી ધૂળ ચટાડી દીધી છે. સમગ્ર મેચ દરમિયાન સ્પેનિશ ખેલાડીઓએ આક્રમક રણનીતિ અપનાવીને ઓસ્ટ્રિયાના ડિફેન્સને વેરવિખેર કરી નાખ્યું હતું.
મેચની શરૂઆતથી જ સ્પેને બોલ પઝેશન પોતાના નિયંત્રણમાં રાખ્યું હતું. સ્પેન તરફથી સ્ટાર ફોરવર્ડ ખેલાડી માઇકલ ઓયાર્ઝાબાલે અદભુત રમત બતાવીને ૩૬મી મિનિટમાં પ્રથમ ગોલ ફટકારી ટીમને ૧-૦ ની મહત્વપૂર્ણ લીડ અપાવી હતી. પ્રથમ હાફની રમત સ્પેનની તરફેણમાં રહ્યા બાદ, બીજા હાફમાં પણ ઓસ્ટ્રિયા વાપસી કરવા માટે સંઘર્ષ કરતું દેખાયું હતું. મેચની ૬૬મી મિનિટમાં પેડ્રો પોરોએ વધુ એક શાનદાર ગોલ કરીને સ્પેનની લીડ બમણી (૨-૦) કરી દીધી હતી. જ્યારે મેચ પુરી થવાની થોડી જ ક્ષણો બાકી હતી, ત્યારે ૮૯મી મિનિટે ફરી એકવાર માઇકલ ઓયાર્ઝાબાલે ઓસ્ટ્રિયાના ગોલકીપરને ચકમો આપીને ત્રીજો ગોલ કર્યો અને સ્પેનની ભવ્ય જીત પર મહોર મારી દીધી હતી. હવે રાઉન્ડ ઓફ ૧૬ના આગામી મુકાબલામાં સ્પેનનો સામનો પોર્ટુગલ અથવા ક્રોએશિયા સામે થશે.
વિશ્વકપની રેસ થઈ રોમાંચક, આ દિગ્ગજ ટીમો પણ ક્વોલિફાય થઈ
આ ભવ્ય વિજય સાથે સ્પેન હવે ટૂર્નામેન્ટના અંતિમ ૧૬માં પહોંચી ગયું છે, જ્યાં અગાઉથી જ બેલ્જિયમ, યુનાઇટેડ સ્ટેટ્સ (USA) અને ઇંગ્લેન્ડ જેવી મજબૂત ટીમોએ પોતાનું સ્થાન સુરક્ષિત કરી લીધું છે. આગામી સમયપત્રક મુજબ, સોમવારે રાઉન્ડ ઓફ ૧૬ના હાઈ-પ્રોફાઈલ મેચમાં ઇંગ્લેન્ડનો સામનો સહ-યજમાન મેક્સિકો સામે થશે, જ્યારે મંગળવારે રોમાંચક ટક્કરમાં સહ-યજમાન અમેરિકાની ટીમ બેલ્જિયમ સામે મેદાને ઉતરશે. આ ઉપરાંત ફૂટબોલના મહાકુંભમાં ફ્રાન્સ, નોર્વે, કેનેડા, મોરોક્કો, બ્રાઝિલ અને પેરાગ્વે જેવી દિગ્ગજ ટીમો પણ રાઉન્ડ ઓફ ૧૬ માટે ક્વોલિફાય થઈ ચૂકી હોવાથી આગામી દિવસોમાં ફૂટબોલ ચાહકોને સુપર સેન્ડે ટક્કરો જોવા મળશે.