ચેન્નઈ: IPL 2026 માં શનિવારની સાંજ ચેન્નઈ સુપર કિંગ્સના નવા સ્ટાર સંજુ સેમસનના નામે રહી. ત્રિવેન્દ્રમના આ વિસ્ફોટક વિકેટકીપર બેટ્સમેને દિલ્હી કેપિટલ્સ સામે રમાયેલી મેચમાં બેટિંગનું એવું પ્રદર્શન કર્યું કે દિગ્ગજ મહેન્દ્ર સિંહ ધોનીનો સર્વકાલીન ઐતિહાસિક રેકોર્ડ પણ ધ્વસ્ત થઈ ગયો. સંજુ સેમસન હવે ચેન્નઈ સુપર કિંગ્સ (CSK) ના ઇતિહાસમાં સદી ફટકારનાર પ્રથમ વિકેટકીપર બેટ્સમેન બની ગયો છે.
ધોનીનો 84 રનનો રેકોર્ડ ભૂતકાળ બન્યો
અત્યાર સુધી CSK માટે વિકેટકીપર તરીકે સૌથી વધુ વ્યક્તિગત સ્કોરનો રેકોર્ડ એમએસ ધોનીના નામે હતો. ધોનીએ 2019માં રોયલ ચેલેન્જર્સ બેંગલુરુ સામે અણનમ 84 રન બનાવ્યા હતા. સંજુએ શનિવારે માત્ર 52 બોલમાં પોતાની સદી પૂરી કરીને આ રેકોર્ડને કચડી નાખ્યો હતો. તેણે પોતાની અણનમ 115 રનની ઇનિંગ દરમિયાન 15 ચોગ્ગા અને 4 ગગનચુંબી છગ્ગા ફટકારીને દિલ્હીના બોલિંગ આક્રમણને વેરવિખેર કરી દીધું હતું.
IPL 2026 ની પ્રથમ સદી
આ સીઝનમાં અત્યાર સુધી કોઈ બેટ્સમેન સદીના આંકડા સુધી પહોંચી શક્યો નહોતો, પરંતુ સંજુએ આ શૂન્યાવકાશ ભરી દીધો છે. તેની 115 રનની ઇનિંગની મદદથી ચેન્નઈ સુપર કિંગ્સે 20 ઓવરમાં 212 રનનો વિશાળ સ્કોર ખડક્યો હતો. સંજુને યુવા આયુષ મ્હાત્રે (59 રન) અને શિવમ દુબેનો પણ સારો સાથ મળ્યો હતો.
CSK ના ઇતિહાસમાં ટોપ-4 માં સ્થાન
સંજુ સેમસનનો આ 115 રનનો સ્કોર CSK ના ઇતિહાસમાં કોઈપણ બેટ્સમેન દ્વારા બનાવવામાં આવેલો ચોથો સૌથી મોટો સ્કોર છે. તેની આગળ હવે માત્ર મુરલી વિજય (127), શેન વોટસન (117*) અને માઈકલ હસી (116*) ના નામ છે.
T20 માં CSK વિકેટકીપર્સનો હાઈએસ્ટ સ્કોર:
1.    સંજુ સેમસન: 115* (વિરુદ્ધ દિલ્હી, 2026)
2.    એમએસ ધોની: 84* (વિરુદ્ધ બેંગલુરુ, 2019)
3.    એમએસ ધોની: 79* (વિરુદ્ધ પંજાબ, 2018)
ચેન્નઈના ચાહકો માટે આ જીતથી પણ વિશેષ આનંદની વાત એ છે કે તેમને ધોની બાદ એક એવો વિકેટકીપર બેટ્સમેન મળી ગયો છે જે મેચનું પાસું પલટવાની ક્ષમતા ધરાવે છે. સોશિયલ મીડિયા પર સંજુની આ ઇનિંગને 'થલા' ના વારસાનું યોગ્ય વિસ્તરણ ગણાવવામાં આવી રહ્યું છે.