લખનૌ : IPL 2026માં લખનૌ સુપર જાયન્ટ્સની સતત બીજી નિરાશાજનક સિઝન બાદ કેપ્ટન રિષભ પંતની કેપ્ટન્સી પર તલવાર લટકી રહી છે. LSGના ડાયરેક્ટર ઓફ ક્રિકેટ ટોમ મૂડીએ પોતે સ્વીકાર્યું છે કે પંતને કેપ્ટન્સી 'પડકારજનક' લાગી છે અને પરિણામો તે દર્શાવે છે. તેમણે સંકેત આપ્યા કે ફ્રેન્ચાઇઝી આગામી સિઝન પહેલા નેતૃત્વમાં ફેરફાર અંગે 'ગંભીર વિચારણા' કરશે. 

શનિવારે એકાના સ્ટેડિયમમાં પંજાબ કિંગ્સ સામે 7 વિકેટે હાર્યા બાદ LSGની સિઝન સમાપ્ત થઈ. આ સિઝનની 10મી હાર સાથે ટીમ પોઈન્ટ ટેબલમાં છેલ્લા સ્થાને રહી. 2025માં 7મા સ્થાને રહ્યા બાદ આ સિઝનમાં LSG 9મા કે 10મા સ્થાને રહેશે.

*પંતની કેપ્ટન્સીમાં LSGનો રેકોર્ડ ખરાબ*

ગત સિઝનથી પંતે લખનૌની 28 મેચમાં કેપ્ટન્સી કરી છે, જેમાંથી 18માં હાર મળી છે અને માત્ર 10 મેચ જ જીતી શક્યા છે. સતત બે સિઝનમાં ટીમ પ્લેઓફ માટે ક્વોલિફાય થઈ શકી નથી.

*બેટથી પણ ફ્લોપ રહ્યો પંત*

રૂ. 27 કરોડમાં ખરીદાયેલો પંત બેટથી પણ અસર કરવામાં નિષ્ફળ રહ્યો છે. આ સિઝનમાં તેણે 28.36ની એવરેજથી માત્ર 312 રન બનાવ્યા છે. LSGમાં બે સિઝનમાં તેણે 135.74ના સ્ટ્રાઇક રેટથી 581 રન બનાવ્યા છે, જે તેના કરિયર સ્ટ્રાઇક રેટ 144.18થી ઓછો છે. 

*ટોમ મૂડીએ શું કહ્યું?*

મેચ બાદ પ્રેસ કોન્ફરન્સમાં મૂડીએ કહ્યું, "કેપ્ટન્સીના દૃષ્ટિકોણથી, તેને પડકારજનક લાગ્યું છે, દેખીતી રીતે, અને પરિણામો તે દર્શાવે છે. અને તમને આશ્ચર્ય થવું જોઈએ કે શું આ દબાણ તેના બેટ સાથેના પ્રદર્શનમાં પ્રતિબિંબિત થાય છે".

"અમે અપેક્ષા કે ધોરણ પ્રમાણે જીવ્યા નથી. અને જ્યારે ફ્રેન્ચાઇઝીના નેતૃત્વની વાત આવે છે, તો ભવિષ્યમાં તે કેવું દેખાય તે અંગે અમે ચોક્કસપણે ખૂબ ગંભીર વિચારણા કરીશું... અમે રીસેટ અંગે વિચાર કરવાની જરૂર છે". 

મૂડીની આ ટિપ્પણી પંત ભારતની ટેસ્ટ વાઇસ-કેપ્ટન્સી KL રાહુલ પાસે ગુમાવે અને ODI ટીમમાંથી બહાર થયાના થોડા દિવસો બાદ આવી છે.