રાજકોટ:IPL 2026 માં પંજાબ કિંગ્સ (PBKS) અત્યારે વિજયના રથ પર સવાર છે. રવિવારે લખનૌ સુપર જાયન્ટ્સ (LSG) સામે મળેલી શાનદાર જીત બાદ મેદાન પર હાઇ-વોલ્ટેજ ડ્રામા અને ભાવુક ક્ષણો જોવા મળી હતી. પંજાબની આ સતત છઠ્ઠી જીત હતી, પરંતુ સોશિયલ મીડિયા પર મેચના સ્કોર કરતા વધુ ચર્ચા ટીમની માલિક પ્રીતિ ઝિન્ટા અને સ્ટાર ફાસ્ટ બોલર અર્શદીપ સિંહની મુલાકાતની થઈ રહી છે.
પ્રીતિનું હૃદયસ્પર્શી આલિંગન અને અર્શદીપની મજાક
મેચ પૂરી થયા પછી જ્યારે પ્રીતિ ઝિન્ટા ખેલાડીઓને અભિનંદન આપવા મેદાન પર આવી, ત્યારે તેણે અર્શદીપ સિંહને જોરદાર ગળે લગાવ્યો હતો. પ્રીતિના આ હૃદયસ્પર્શી આલિંગન પછી અર્શદીપ એટલો ખુશ દેખાતો હતો કે તેણે હવામાં મુક્કા મારીને અનોખી રીતે જશ્ન મનાવવાનું શરૂ કર્યું હતું. અર્શદીપની આ રમુજી સ્ટાઈલ જોઈને પ્રીતિ ઝિન્ટા અને બાજુમાં ઉભેલા મોહમ્મદ શમી પણ ખડખડાટ હસી પડ્યા હતા. આ વીડિયો વાયરલ થતા નેટીઝન્સ પણ મજાક કરી રહ્યા છે કે, "પંજાબના ખેલાડીઓ મેચ જીતવા કરતા પ્રીતિ મેડમને મળ્યા પછી વધુ ઉજવણી કરે છે!"
હાઈ-સ્કોરિંગ થ્રિલરમાં પંજાબનો દબદબો
મેચની વાત કરીએ તો, પંજાબ કિંગ્સે પ્રથમ બેટિંગ કરતા ૨૫૪ રનનો પહાડ જેવો સ્કોર ખડક્યો હતો. પ્રિયાંશ આર્ય અને કૂપર કોનોલી વચ્ચે થયેલી રેકોર્ડબ્રેક ભાગીદારીએ લખનૌના બોલરોને બરાબરના ધોયા હતા. પંજાબની આ સિઝનમાં શરૂઆત એટલી શક્તિશાળી છે કે તેઓ હજુ સુધી એક પણ મેચ હાર્યા નથી અને પોઈન્ટ ટેબલમાં ટોચ પર બિરાજમાન છે.
લખનૌની લડત પડી ટૂંકી
૨૫૫ રનના વિશાળ લક્ષ્યનો પીછો કરવા ઉતરેલી લખનૌ સુપર જાયન્ટ્સે પણ સારી લડત આપી હતી. ઋષભ પંતે ૪૩ અને એડન માર્કરામે ૪૨ રનની આક્રમક ઈનિંગ્સ રમી હતી, પરંતુ પંજાબના બોલરો સામે રન રેટ સતત વધતો ગયો. મિશેલ માર્શ અને આયુષ બડોનીએ મધ્યમાં થોડી આશા જગાડી હતી, પરંતુ અંતે લખનૌ ૨૦ ઓવરમાં ૨૦૦ રન સુધી જ પહોંચી શક્યું હતું અને પંજાબે ૫૪ રનથી ભવ્ય જીત નોંધાવી હતી.
 
PBKS vs LSG મેચ હાઇલાઇટ્સ:
•    પરિણામ: પંજાબ કિંગ્સ ૫૪ રનથી જીત્યું.
•    રેકોર્ડ: પંજાબની આ સિઝનમાં સતત ૬ઠ્ઠી જીત.
•    હીરો: પ્રિયાંશ આર્ય અને અર્શદીપ સિંહ (રમુજી જશ્ન માટે).
•    LSG સ્કોર: ૨૦ ઓવરમાં ૨૦૦/૫.