નિશિન, તા.29: એશિયન ગેમ્સ ૨૦૨૬માં મંગળવારે એક મોટો રાજકીય અને રમતગમતનો વળાંક જોવા મળ્યો છે. સતત પડી રહેલા ભારે વરસાદ અને ખરાબ હવામાનના કારણે ક્વાર્ટરફાઈનલની મેચો ધોવાઈ જતાં, એક પણ બોલ ફેંકાયા વિના જ બાંગ્લાદેશ અને શ્રીલંકાએ સેમીફાઈનલમાં પ્રવેશ કરી લીધો છે. બીજી તરફ, મેદાન પર ઉતરીને પોતાની તાકાત બતાવવાની આશા રાખતી નેપાળ અને મલેશિયાની ટીમો માટે આ વરસાદ વિલન બન્યો છે અને તેઓ ટૂર્નામેન્ટમાંથી બહાર ફેંકાઈ ગઈ છે.

ટોસ પણ ન થઈ શક્યો, મેચ રદ જાહેર કરી પડી

મંગળવારે નિશિનના કોરોગી સ્પોર્ટ્સ પાર્ક ખાતે બપોરના સત્રમાં યોજાનારી ચોથી ક્વાર્ટરફાઈનલ મેચમાં બાંગ્લાદેશનો સામનો મલેશિયા સામે થવાનો હતો. પરંતુ સવારથી જ પડી રહેલા અવિરત વરસાદના કારણે આખું મેદાન જળબંબાકાર થઈ ગયું હતું. અમ્પાયરો અને મેચ અધિકારીઓએ લાંબી રાહ જોયા બાદ આખરે ટોસ કર્યા વગર જ મેચ રદ કરવાની ફરજ પડી હતી. આ જ રીતે, સવારના સત્રમાં નેપાળ અને શ્રીલંકા વચ્ચે રમાનારી ક્વાર્ટરફાઈનલ મેચ પણ વરસાદની ભેટ ચડી ગઈ હતી.

ICC રેન્કિંગે બચાવી લીધા; નેપાળ-મલેશિયા આઉટ

એશિયન ગેમ્સના નિયમો અનુસાર, જો નોકઆઉટ મેચ વરસાદ કે ખરાબ હવામાનને કારણે રદ થાય છે, તો આંતરરાષ્ટ્રીય ક્રિકેટ કાઉન્સિલ (ICC) ની ટી૨૦ રેન્કિંગમાં જે ટીમ આગળ હોય તેને વિજેતા જાહેર કરી આગામી રાઉન્ડમાં મોકલવામાં આવે છે. શ્રીલંકા અને બાંગ્લાદેશનું રેન્કિંગ નેપાળ અને મલેશિયા કરતાં ઘણું સારું હોવાથી, બંને ટીમોને રમત રમ્યા વગર જ સીધી સેમીફાઈનલની ટિકિટ મળી ગઈ હતી, જ્યારે આઉટસાઈડર ગણાતી નેપાળ અને મલેશિયાનું સપનું છીનવાઈ ગયું હતું.

સેમીફાઈનલમાં ભારત અને પાકિસ્તાન સામે જંગ

હવે ફેન્સ માટે હાઈ-વોલ્ટેજ મેચોનો તબક્કો શરૂ થવા જઈ રહ્યો છે. ગુરુવારે, ૧ ઓક્ટોબરે યોજાનારી પ્રથમ સેમીફાઈનલ મેચમાં સુપરફેવરિટ ભારતીય ક્રિકેટ ટીમનો સામનો શ્રીલંકા સામે થશે. જ્યારે બીજી સેમીફાઈનલમાં પાકિસ્તાનની ટીમ બાંગ્લાદેશ સામે ટકરાશે. જો ભારત અને પાકિસ્તાન બંને પોતપોતાની સેમીફાઈનલ જીતી જશે, તો ચાહકોને એશિયન ગેમ્સના ગોલ્ડ મેડલ માટે ભારત-પાકિસ્તાન વચ્ચે ડ્રીમ ફાઈનલ જોવા મળશે.