ઇસ્લામાબાદ, તા.૨૩: આગામી 'આઈસીસી મેન્સ ક્રિકેટ વર્લ્ડ કપ ૨૦૨૭' ની પૂર્વતૈયારીઓ સઘન બનાવતા પાકિસ્તાન ક્રિકેટ બોર્ડ (PCB) અને ઇંગ્લેન્ડ એન્ડ વેલ્સ ક્રિકેટ બોર્ડ (ECB) એ એક મહત્વનો નિર્ણય લીધો છે. પાકિસ્તાનની રાષ્ટ્રીય ક્રિકેટ ટીમ મે ૨૦૨૭ માં પાંચ મેચોની એક દિવસીય (ODI) આંતરરાષ્ટ્રીય શ્રેણી માટે ઇંગ્લેન્ડનો પ્રવાસ કરશે. બંને દેશો વચ્ચે રમાનારી આ શ્રેણીનું સત્તાવાર ટાઇમટેબલ જાહેર કરી દેવામાં આવ્યું છે.
વર્લ્ડ કપ ૨૦૨૭ નો રોડમેપ
આ ૫૦ ઓવરની વન-ડે શ્રેણી મેગા ઇવેન્ટ એટલે કે વર્લ્ડ કપ ૨૦૨૭ પહેલા બંને ટીમો માટે શક્તિપ્રદર્શન અને પ્રયોગો કરવાનો ઉત્તમ મંચ સાબિત થશે. ઉલ્લેખનીય છે કે, ૨૦૨૭ નો વન-ડે વર્લ્ડ કપ ૪ ઓક્ટોબર થી ૨૧ નવેમ્બર, ૨૦૨૭ દરમિયાન દક્ષિણ આફ્રિકા, ઝિમ્બાબ્વે અને નામિબિયા દ્વારા સંયુક્ત રીતે યોજાવાનો છે.
પાકિસ્તાને છેલ્લે વર્ષ ૨૦૨૧ માં વન-ડે શ્રેણી માટે ઇંગ્લેન્ડનો પ્રવાસ કર્યો હતો, જ્યાં યજમાન ઇંગ્લેન્ડે ૩-૦ થી ક્લીન સ્વીપ કર્યું હતું. આ વખતે પાકિસ્તાની ટીમ તે હારનો બદલો લેવાના ઇરાદા સાથે મેદાનમાં ઊતરશે.
પાકિસ્તાનનો ઇંગ્લેન્ડ પ્રવાસ ૨૦૨૭: મેચોનું પૂરૂં શેડ્યૂલ
બંને ટીમો વચ્ચેની પાંચેય મેચો ઇંગ્લેન્ડના પ્રખ્યાત અને ઐતિહાસિક મેદાનો પર રમાશે:
•    ૧૫ મે: ૧લી વન-ડે, સાઉધમ્પ્ટન
•    ૧૯ મે: ૨જી વન-ડે, માન્ચેસ્ટર
•    ૨૧ મે: ૩જી વન-ડે, લીડ્સ
•    ૨૩ મે: ૪થી વન-ડે, ચેસ્ટર-લે-સ્ટ્રીટ
•    ૨૬ મે: ૫મી વન-ડે, કાર્ડિફ
હાલમાં વેસ્ટ ઇન્ડીઝ સામે બે ટેસ્ટ મેચોની શ્રેણી રમી રહેલી પાકિસ્તાની ટીમ, આગામી મહિને ૧૯ ઓગસ્ટથી ૧૩ સપ્ટેમ્બર દરમિયાન ત્રણ ટેસ્ટ મેચોની શ્રેણી માટે પણ ઇંગ્લેન્ડનો પ્રવાસ કરવાની છે.