મુંબઈ, તા.28: ભારતીય ક્રિકેટ ટીમમાં ઓપનિંગ સ્લોટ માટે ચાલી રહેલી તીવ્ર સ્પર્ધા અને નવા યુવા ખેલાડીઓના ઉભરવાની વચ્ચે અનુભવી બેટ્સમેન સંજુ સેમસનનું એક સનસનાટીભર્યું નિવેદન સોશિયલ મીડિયા પર વાયરલ થઈ રહ્યું છે. ભારત વિરુદ્ધ ઝિમ્બાબ્વે શ્રેણીમાં ૧૪ વર્ષીય યુવા સન્સની વૈભવ સૂર્યવંશીએ ધમાકેદાર પ્રદર્શન કરીને 'પ્લેયર ઓફ ધ સિરીઝ'નો એવોર્ડ જીત્યા બાદ, ટીમ ઈન્ડિયામાં સંજુ સેમસનના ભવિષ્ય અને વાપસી પર અનેક સવાલો ઊભા થઈ રહ્યા હતા. આ તમામ અટકળો વચ્ચે ૩૧ વર્ષીય સંજુ સેમસને 'JioHotstar' ને આપેલા એક ખાસ ઇન્ટરવ્યુમાં પોતાની મનની વાત ખુલ્લીને રજૂ કરી છે.
"હું મારી પોતાની શરતો પર જ રમીશ"
સંજુ સેમસને ભારતીય ટીમમાં સ્થાન મેળવવા માટે ચાલતી ગળાકાપ સ્પર્ધા અંગે અત્યંત ગંભીર અને સ્પષ્ટ વલણ અપનાવ્યું છે. તેણે કહ્યું, "મને સમજાઈ ગયું છે કે આપણા દેશમાં સતત સ્પર્ધા ચાલતી જ રહેવાની છે. મેં ૨૦૨૬ T20 વર્લ્ડ કપ પહેલા જ નક્કી કરી લીધું હતું કે હું આ રેસ કે દબાણનો ભાગ નહીં બનું. હું ફક્ત રમતનો આનંદ માણવા માગું છું. ભગવાનની કૃપાથી મેં ઘણું બધું હાંસલ કર્યું છે. હું હવે ૩૧ વર્ષનો છું અને મારી પાસે થોડા વર્ષો જ બાકી છે, તેથી મેં મારી શરતો પર રમવાનું નક્કી કર્યું છે. કોઈ મને આવીને નહીં કહે કે કેવી રીતે બેટિંગ કરવી કે શું કરવું! સંજુ પોતે જ પોતાના નિર્ણયો લેશે."
2028ના વર્લ્ડ કપ પ્લાનિંગ પર મોટો ખુલાસો
જ્યારે સંજુને ૨૦૨૮ના T20 વર્લ્ડ કપમાં રમવા અંગે પૂછવામાં આવ્યું ત્યારે તેણે કહ્યું કે, "હું ૨૦૨૪ વર્લ્ડ કપ પછી ૨૦૨૬ના વર્લ્ડ કપમાં રમીશ તેવી અપેક્ષા પણ રાખતો નહોતો. એક સમયે તો હું ૧૫ સભ્યોની સ્ક્વોડમાં પણ નહોતો. તો પછી હું અત્યારથી ૨૦૨૮ માટે કેવી રીતે યોજના બનાવી શકું? જો હું તે સમયે ત્યાં હોઈશ, ટીમને મારી જરૂર હશે અને હું સારું રમી રહ્યો હોઈશ તો બધું સારું થશે. જો નહીં થાય, તો પણ મને કોઈ અફસોસ નથી. હું ખૂબ જ આભારી છું, મારી સિદ્ધિઓ મારી પાસેથી કોઈ છીનવી શકશે નહીં."
આર્ચર સામેના ડર અને T20 વર્લ્ડ કપ સેમિફાઇનલનો કિસ્સો
ઇન્ટરવ્યૂ દરમિયાન સંજુએ વાનખેડે સ્ટેડિયમમાં ઇંગ્લેન્ડ સામે રમાયેલી T20 વર્લ્ડ કપ સેમિફાઇનલ યાદ કરી હતી. તેણે જણાવ્યું કે, "સેમિફાઇનલ પહેલા લોકો મારી પાસે આવીને કહેતા હતા કે 'સામે જોફ્રા આર્ચર છે, તેણે તને ભૂતકાળમાં ૩-૪ વાર આઉટ કર્યો છે.' પરંતુ મને મારા પર પૂરો ભરોસો હતો. વેસ્ટ ઈન્ડીઝ સામેની ઇનિંગ્સ પછી મને આત્મવિશ્વાસ મળી ગયો હતો કે હું મારી દેશ માટે કંઈ પણ કરી શકું છું. સંજુ એક વર્ષ પહેલા હતો તેવો હવે નથી રહ્યો." ફાઇનલ મેચ વિશે વાત કરતા તેણે ઉમેર્યું કે, "મન મજબૂત હોય ત્યારે સમય લેવામાં વાંધો નથી આવતો. ફાઇનલમાં મેં સેન્ટનર સામે સતત ૪ ડોટ બોલ રમ્યા હતા, પણ મને ખબર હતી કે હું બીજી જ ઓવરમાં બે સિક્સર મારીને ભરપાઈ કરી શકું છું."
ટીમ ઈન્ડિયાના ઓપનિંગ સ્લોટમાં ભારે ખેંચતાણ
હાલમાં ભારતીય T20 ટીમમાં ઓપનિંગ સ્લોટ માટે ભારે ટક્કર જોવા મળી રહી છે. એકતરફ યુવા વૈભવ સૂર્યવંશીની વિસ્ફોટક બેટિંગે બધાનું ધ્યાન ખેંચ્યું છે, તો બીજી તરફ પ્રભસિમરન સિંહ પણ તકની રાહ જોઈ રહ્યો છે. વળી, અનુભવી શુભમન ગિલ અને યશસ્વી જયસ્વાલ જેવા ઓપનરોની ગેરહાજરી વચ્ચે સંજુનું આ આત્મવિશ્વાસથી સભર અને સ્પષ્ટ નિવેદન દર્શાવે છે કે તે ભવિષ્યની ચિંતા કર્યા વિના પોતાની રમતનો આનંદ માણવા માંગે છે.