નવી દિલ્હી:  ભારત અને પાકિસ્તાન વચ્ચેના ક્રિકેટ સંબંધોમાં લાંબા સમયથી ચાલી રહેલા ગજગ્રાહ વચ્ચે કેન્દ્ર સરકારે એક અત્યંત મહત્વપૂર્ણ વ્યૂહાત્મક નિર્ણય લીધો છે. હવે પાકિસ્તાની ખેલાડીઓ એશિયા કપ કે વર્લ્ડ કપ જેવી મલ્ટી-નેશનલ ઇવેન્ટ્સ માટે ભારત આવી શકશે. સરકારના આ નિર્ણયથી રમતગમત જગતમાં નવી આશા જાગી છે, કારણ કે અત્યાર સુધી પાકિસ્તાની ટીમ સુરક્ષા અને રાજકીય કારણોસર ભારત આવવાથી વંચિત રહેતી હતી. જોકે, આ મંજૂરી માત્ર આંતરરાષ્ટ્રીય સ્તરની મોટી ટુર્નામેન્ટ્સ પૂરતી જ મર્યાદિત રાખવામાં આવી છે.

આ નિર્ણય સાથે સરકારે પોતાની 'નો-ટ્રાવેલ' પોલિસી પણ સ્પષ્ટ કરી દીધી છે. ભારતે સ્પષ્ટ શબ્દોમાં જણાવ્યું છે કે પાકિસ્તાની ટીમ ભલે ભારત આવે, પરંતુ ભારતીય ટીમ રમવા માટે ક્યારેય પાકિસ્તાન જશે નહીં. આનો અર્થ એ થયો કે ભવિષ્યમાં જો પાકિસ્તાન કોઈ મોટી ટુર્નામેન્ટનું આયોજન કરે, તો ભારતીય ટીમ હજુ પણ તેની મેચો અન્ય દેશો (ન્યુટ્રલ વેન્યુ) પર રમવાનું ચાલુ રાખશે. વધુમાં, બંને દેશો વચ્ચેની સીધી દ્વિપક્ષીય શ્રેણી (Bilateral Series) પરનો પ્રતિબંધ હજુ પણ યથાવત રાખવામાં આવ્યો છે.

તાજેતરના વર્ષોમાં ચેમ્પિયન્સ ટ્રોફી અને T20 વર્લ્ડ કપ દરમિયાન જોવા મળ્યું હતું કે બંને દેશોએ એકબીજાની ધરતી પર રમવાનો ઇનકાર કર્યો હતો, જેના કારણે હાઇબ્રિડ મોડલ અપનાવવું પડ્યું હતું. હવે જ્યારે ભારત સરકારે પાકિસ્તાની ખેલાડીઓ માટે લીલી ઝંડી આપી દીધી છે, ત્યારે વિશ્વ ક્રિકેટની નજર પાકિસ્તાન ક્રિકેટ બોર્ડ (PCB) ના વલણ પર ટકેલી છે. શું પાકિસ્તાન આ શરતો સાથે પોતાની ટીમને ભારત મોકલશે કે કેમ તે જોવું રસપ્રદ રહેશે, કારણ કે આ નિર્ણયથી ભવિષ્યની મોટી ટુર્નામેન્ટ્સના આયોજનનો માર્ગ મોકળો થઈ શકે છે.