લાહોર : પાકિસ્તાની ક્રિકેટ જગતમાં હાલમાં ઇમામ-ઉલ-હકની ઈજાનો મામલો જોરશોરથી ચર્ચામાં છે. ઇંગ્લેન્ડ સામેની ટેસ્ટ શ્રેણી દરમિયાન ઈજાનો ખોટો ઉપયોગ કરવાના આરોપસર કથિત રીતે પાછા મોકલાયા બાદ, હવે સોશિયલ મીડિયા પર એક આર્ટિફિશિયલ ઇન્ટેલિજન્સ (AI) જનરેટેડ વીડિયો વાયરલ થયો છે, જેણે ઇન્ટરનેટ પર હાસ્યનું મોજું ફેલાવી દીધું છે. આ વાયરલ પેરોડી વીડિયોમાં ઇમામ-ઉલ-હક બોલિવૂડ ફિલ્મ 'વેલકમ'ના પ્રખ્યાત ડાયલોગ અંદાજમાં પોતાની ઈજા અંગે રમૂજી ખુલાસા કરતા નજરે પડી રહ્યા છે.

વાયરલ થયેલી આ ક્લિપમાં ઇન્ટરવ્યુઅર જ્યારે ઇમામને પૂછે છે કે લોકો તેમની ઈજાને બનાવટી ગણાવી રહ્યા છે, ત્યારે વીડિયોમાં ઇમામ મસ્તીભર્યા અંદાજમાં કહે છે, "મેરી એક ટાંગ નકલી હૈ... બાબર ભાઈને બેટથી મારા પગના બે ટુકડા કરી દીધા હતા." વીડિયોના અંતમાં ઉમર અકમલના અગાઉના એક વિવાદાસ્પદ નિવેદનને પણ જોડવામાં આવ્યું છે, જેના કારણે આ વીડિયો સોશિયલ મીડિયા પર અત્યંત લોકપ્રિય બની રહ્યો છે.

પાકિસ્તાન પહોંચ્યા બાદ સામાન્ય રીતે ચાલતા હોવાના વીડિયો વાયરલ

ઉલ્લેખનીય છે કે, લોર્ડ્સ ટેસ્ટ દરમિયાન ઈજાના કારણે વિવાદમાં આવેલા ઇમામ-ઉલ-હકને બર્મિંગહામ ટેસ્ટ પહેલાં શ્રેણીની વચ્ચે જ ઘરે પરત મોકલી દેવામાં આવ્યા હતા. સોશિયલ મીડિયા પર એવા અનેક વીડિયો પણ સામે આવ્યા છે જેમાં દાવો કરવામાં આવી રહ્યો છે કે પાકિસ્તાન પહોંચ્યા બાદ ઇમામ કોઈપણ પ્રકારની ઇજા કે લંગડા વગર એકદમ સામાન્ય રીતે ચાલી રહ્યા છે, જેના કારણે ચાહકો દ્વારા તેમની ભારે મજાક ઉડાવવામાં આવી રહી છે અને આ પૂરા વિવાદે ક્રિકેટ વર્તુળોમાં નવો જ વળાંક લીધો છે.