ન્યૂ યૉર્ક : વિશ્વના સૌથી લોકપ્રિય રમત ઉત્સવ એવા ૨૩મા ફિફા વર્લ્ડ કપ (FIFA World Cup 2026) ની મહાફાઇનલ પૂર્વે ફૂટબોલ પ્રેમીઓ માટે એક અત્યંત રોમાંચક અને આશ્ચર્યજનક સમાચાર સામે આવ્યા છે. રવિવારે ફૂટબોલ જગતના બે મહારથીઓ આર્જેન્ટિના અને સ્પેન વચ્ચે રમાનારી ખિતાબી જંગ બાદ વિજેતાઓ પર અબજો રૂપિયાની વર્ષા થવાની છે. ફિફા દ્વારા આ વર્ષે કુલ ઇનામી રકમમાં વર્ષ ૨૦૨૨ના વર્લ્ડ કપની તુલનાએ રેકોર્ડબ્રેક ૬૫ ટકાનો જંગી વધારો કરવામાં આવ્યો છે. આ વખતે ફિફા કુલ ૮૭૧ મિલ્યન ડૉલર એટલે કે અંદાજે ₹૮૪ અબજ રૂપિયાની માતબર રકમ ઇનામ સ્વરૂપે વહેંચવા જઈ રહ્યું છે.
ચૅમ્પિયન બનનાર દેશ રાતોરાત બનશે અબજોપતિ:
આ મહાયુદ્ધમાં જે ટીમ ફાઇનલ જીતીને વર્લ્ડ ચૅમ્પિયન બનવાનું ગૌરવ પ્રાપ્ત કરશે, તેને ફિફા તરફથી ૫૦ મિલ્યન ડૉલર એટલે કે અંદાજે ₹૪૮૧.૪૨ કરોડનું પ્રથમ ઇનામ આપવામાં આવશે. જ્યારે ફાઇનલમાં હારનારી એટલે કે રનર-અપ બનનારી ટીમને પણ નિરાશ થવાની જરૂર નથી, કારણ કે તેને પણ ૩૩ મિલ્યન ડૉલર એટલે કે અંદાજે ₹૩૧૭.૭૪ કરોડની તોતિંગ રકમ મળશે.
દરેક ભાગ લેનાર ટીમ પર થશે લક્ષ્મીજીની કૃપા:
ફિફાએ આ વખતે માત્ર ફાઇનલ રમનારી ટીમો જ નહીં, પરંતુ ટૂર્નામેન્ટમાં ભાગ લેનારી તમામ ૪૮ ટીમો માટે ઇનામોની વહેંચણી કરી છે. ત્રીજા અને ચોથા ક્રમે રહેનારી ટીમો ઉપરાંત ક્વૉર્ટર ફાઇનલ સુધી પહોંચનારી (૫ થી ૮મો ક્રમ), પ્રી-ક્વૉર્ટર ફાઇનલ (૯ થી ૧૬મો ક્રમ) અને ગ્રુપ સ્ટેજમાં બહાર થનારી (૧૭ થી ૪૮મો ક્રમ) તમામ ટીમોને પણ તેમના પ્રદર્શનના આધારે કરોડો રૂપિયાના નાના-મોટા ઇનામો એનાયત કરવામાં આવશે.
ઇતિહાસમાં પહેલીવાર: અમેરિકન સ્ટાઇલમાં મળશે ડાયમંડ રિંગ!
આ વર્લ્ડ કપની સૌથી અનોખી અને આકર્ષક બાબત એ છે કે ફૂટબોલના ઇતિહાસમાં પહેલીવાર વિજેતા ટીમને મેડલની સાથે હીરાજડિત વીંટી આપવામાં આવશે. અમેરિકાની ખેલકૂદ જગતની પ્રખ્યાત પરંપરાને અનુસરીને, ફિફા વર્લ્ડ કપ જીતનારી ટીમના ખેલાડીઓ, કોચ અને સપોર્ટ સ્ટાફ સહિત કુલ ૩૦ મુખ્ય સભ્યોને ખાસ ડિઝાઇન કરાયેલી 'ચૅમ્પિયનશિપ રિંગ' (Championship Ring) વહેંચવામાં આવશે.
આ ઉપરાંત, આ ઐતિહાસિક ક્ષણને યાદગાર બનાવવા માટે ફિફા દ્વારા આવી જ અન્ય ૧,૯૯૬ ડાયમંડ રિંગ્સ ખાસ જાહેર જનતા માટે પણ અલગ રાખવામાં આવી છે. આ વીંટીઓ ફૂટબોલ ચાહકોને ઑફિશ્યલ લાઇસન્સ કલેક્ટિબલ્સ (યાદગાર ભેટ) તરીકે ખરીદવા અથવા મેળવવાની સુવર્ણ તક મળશે. હવે આખી દુનિયાની નજર રવિવારની ફાઇનલ મેચ પર છે, જ્યાં ખેલાડીઓ ટ્રોફીની સાથે આ અબજો રૂપિયાના ઇનામને પોતાના નામે કરવા મેદાન પર લોહી-પાણી એક કરશે.