તા. ૨૭ ઓગષ્ટ ર૦ર૬ વિક્રમ સંવત ર૦૮૨ શ્રાવણ સુદ – ૧૪ ગુરૂવાર
માઈલસ્ટોન સીઝન : BCCIએ જાહેર કર્યો ઘરેલુ ક્રિકેટનો રોડમેપ, પુરૂષ અને મહિલા ક્રિકેટ મળીને રમાશે ૧,૭૮૮ મેચ
૨૩ ઓગસ્ટથી દૂલીપ ટ્રોફી સાથે મેગા સીઝનની ધમાકેદાર શરૂઆત : શ્રીનગરમાં રમાશે ઈરાની કપ, રણજી ટ્રોફી પણ બે અલગ ફેઝમાં રમાશે : અંડર-૨૩ કેટેગરીમાં પણ મોટા ફેરફાર
નવી દિલ્હી : ભારતીય ક્રિકેટ કંટ્રોલ બોર્ડ (BCCI)એ આગામી ૨૦૨૬-૨૭ની ડોમેસ્ટિક (ઘરેલું) સીઝનની સત્તાવાર જાહેરાત કરી દીધી છે. આ વખતે ક્રિકેટ રસિકોને રોમાંચનો જબરદસ્ત ડોઝ મળવાનો છે, કારણ કે બોર્ડ દ્વારા આ સીઝન દરમિયાન વિવિધ વયજૂથો અને ફોર્મેટમાં મળીને કુલ ૧,૭૮૮ મેચોનું ભવ્ય આયોજન કરવામાં આવ્યું છે. આ મેગા શેડ્યૂલમાં પુરૂષ અને મહિલા બંને વર્ગની સિનિયરથી લઈને જુનિયર કેટેગરીની ટૂર્નામેન્ટ્સનો સમાવેશ થાય છે.
દૂલીપ ટ્રોફીથી થશે શાનદાર શરૂઆત
BCCIના જણાવ્યા અનુસાર, ડોમેસ્ટિક સીઝનની શરૂઆત ૨૩ ઓગસ્ટ ૨૦૨૬થી પ્રતિષ્ઠિત દૂલીપ ટ્રોફી સાથે થશે. આ ટૂર્નામેન્ટ બેંગલુરુ સ્થિત BCCIના સેન્ટર ઓફ એક્સેલન્સ ખાતે ઝોનલ ફોર્મેટમાં રમાશે. ત્યારબાદ, ૧ ઓગસ્ટથી ૫ ઓક્ટોબર દરમિયાન શ્રીનગરમાં રણજી ચેમ્પિયન જમ્મુ-કાશ્મીર અને રેસ્ટ ઓફ ઈન્ડિયા વચ્ચે હાઈ-વોલ્ટેજ ઈરાની કપનો મુકાબલો રમાશે.
બે તબક્કામાં રમાશે રણજી ટ્રોફી
ખેલાડીઓના વર્કલોડ (કાર્યભાર) ને મેનેજ કરવા અને તેમને પૂરતો આરામ મળી રહે તે હેતુથી ્પ્રખ્યાત રણજી ટ્રોફીને બે અલગ-અલગ ફેઝમાં વહેંચવામાં આવી છે. પ્રથમ તબક્કો ૧૧ ઓક્ટોબરથી ૫ નવેમ્બર ૨૦૨૬ સુધી રમાશે, જેમાં લીગ સ્ટેજના પ્રથમ ચાર રાઉન્ડ રમાશે.
બીજો તબક્કોર્ઃં સફેદ બોલ (વ્હાઈટ બોલ) ક્રિકેટ બાદ એટલે કે ૧૭ જાન્યુઆરીથી શરૂ થશે. જ્યારે રણજી ટ્રોફીના નોકઆઉટ મુકાબલા ૯ ફેબ્રુઆરીથી ૩ માર્ચ ૨૦૨૭ દરમિયાન રમાશે.
સૈયદ મુશ્તાક અલી અને વિજય હજારે ટ્રોફીની તારીખો
રણજી ટ્રોફીના બે ફેઝની વચ્ચે મર્યાદિત ઓવરોની બે મોટી ટૂર્નામેન્ટ રમાશે. ભારતની પ્રીમિયર ડોમેસ્ટિક ટી૨૦ ટૂર્નામેન્ટ સૈયદ મુશ્તાક અલી ટ્રોફી ૧૪ નવેમ્બરથી ૬ ડિસેમ્બર ૨૦૨૬ દરમિયાન મુંબઈ, મોહાલી, વિશાખાપટ્ટનમ અને કોલકાતા ખાતે રમાશે. જ્યારે તેની નોકઆઉટ મેચો નાગપુરમાં યોજાશે. આ ઉપરાંત ૫૦ ઓવરની વિજય હજારે ટ્રોફી ૧૪ ડિસેમ્બર ૨૦૨૬થી ૮ જાન્યુઆરી ૨૦૨૭ દરમિયાન રમાશે.
અંડર-૨૩ કેટેગરીમાં મોટા ફેરફારો
આ સીઝનમાં આધુનિક ક્રિકેટની માંગને ધ્યાનમાં રાખીને BCCI એ કેટલાક મહત્વના ફેરફારો કર્યા છે. પુરૂષોની અંડર-૨૩ સ્ટેટ એ ટ્રોફી અને યુનિવર્સિટી સ્તરની વિઝી ટ્રોફીને હવે ટી૨૦ ફોર્મેટમાં ફેરવી દેવામાં આવી છે. આ સાથે જ પ્રતિભાશાળી યુવા ખેલાડીઓને મોટું પ્લેટફોર્મ પૂરું પાડવા માટે લાંબા સમય પછી સી.કે. નાયડુ ટ્રોફી વિજેતા વિરૂદ્ધ રેસ્ટ ઓફ ઈન્ડિયા મેચની વાપસી થઈ છે, જે ૧ ઓક્ટોબરથી ચેન્નાઈમાં રમાશે.
મહિલા ક્રિકેટ માટે પણ ખાસ રોડમેપ
મહિલા ક્રિકેટના વિકાસ માટે BCCIએ આ સીઝનમાં સિનિયર ઉપરાંત અંડર-૨૩, અંડર-૧૯ અને અંડર-૧૫ સ્તરે એક વ્યાપક કેલેન્ડર તૈયાર કર્યું છે. સિનિયર મહિલા ટી૨૦ ટ્રોફી (એલિટ) ૨૬ ઓક્ટોબરથી શરૂ થશે, જેના નોકઆઉટ મુકાબલા ૧૪ થી ૨૦ નવેમ્બર દરમિયાન અમદાવાદમાં રમાશે.
BCCIએ જણાવ્યું કે, ૨૦૨૬-૨૭ની આ ઘરેલું સીઝન ભારતમાં ક્રિકેટના પાયાને વધુ મજબૂત બનાવશે અને ખેલાડીઓને તમામ ફોર્મેટમાં પોતાની ક્ષમતા સાબિત કરવાની સુવર્ણ તક આપશે.
(3:14 PM IST)
છેલ્લા 8 દિવસમાં સૌથી લોકપ્રિય 
