ક્રિકેટના નિયમોમાં સમયાંતરે ફેરફાર થતો રહે છે અને હવે ભારતીય ક્રિકેટ કંટ્રોલ બોર્ડ (BCCI) ભારતીય ઘરેલુ ક્રિકેટમાં અનેક મહત્વપૂર્ણ નિયમો લાગુ કરવાની તૈયારીમાં છે. મેરીલેબોન ક્રિકેટ ક્લબ (MCC) દ્વારા પ્રસ્તાવિત નિયમોમાંથી કેટલાક નિયમોને ભારતીય સ્થાનિક ક્રિકેટમાં લાગુ કરવામાં આવશે. આ નવા નિયમો રણજી ટ્રોફી, વિજય હજારે ટ્રોફી અને સૈયદ મુશ્તાક અલી ટ્રોફી સહિત વિવિધ ઘરેલુ ટૂર્નામેન્ટમાં જોવા મળશે. આ ફેરફારોમાં ફર્સ્ટ ક્લાસ ક્રિકેટની દિવસની છેલ્લી ઓવરથી લઈને વનડેમાં હેડ કોચની મેદાનમાં એન્ટ્રી, ડેડ બોલ, વાઈડ બોલ, ફિલ્ડરોની સ્થિતિ અને વિકેટકીપરના ગ્લોવ્ઝ સંબંધિત નિયમોનો સમાવેશ થાય છે. એટલે કે, ભારતીય ઘરેલુ ક્રિકેટમાં ખેલાડીઓ, કોચ અને અમ્પાયરો માટે રમતના કેટલાક મહત્વપૂર્ણ નિયમો બદલાવા જઈ રહ્યા છે.

નવા નિયમો હેઠળ ફર્સ્ટ ક્લાસ ક્રિકેટમાં દિવસની અંતિમ ઓવર અધૂરી છોડવામાં આવશે નહીં. જો છેલ્લી ઓવર દરમિયાન વિકેટ પડી જાય તો પણ રમત તરત જ બંધ નહીં થાય. નવા બેટ્સમેનને મેદાનમાં આવીને ઓવરનો બાકી રહેલો બોલ રમવો પડશે. અગાઉ કેટલાક સંજોગોમાં વિકેટ પડ્યા બાદ દિવસની રમત સમાપ્ત થઈ શકતી હતી, પરંતુ હવે અંતિમ ઓવર પૂર્ણ કરવી ફરજિયાત બનશે. આ નિયમનો હેતુ રમતના અંતિમ તબક્કામાં સ્પષ્ટતા અને સમાનતા જાળવવાનો છે. બીજી તરફ, વનડે મેચ દરમિયાન ડ્રિંક્સ બ્રેક સમયે હેડ કોચને મેદાનમાં પ્રવેશવાની મંજૂરી આપવામાં આવશે.

આથી કોચ ખેલાડીઓ સાથે સીધી વાતચીત કરીને જરૂરી વ્યૂહરચના અંગે માર્ગદર્શન આપી શકશે.

નવા નિયમોમાં શોર્ટ રન અંગે પણ મહત્વપૂર્ણ જોગવાઈ કરવામાં આવી છે. જો કોઈ બેટ્સમેન જાણીજોઈને ઓછા રન લેતો હોવાનું માનવામાં આવે તો ફિલ્ડિંગ ટીમના કેપ્ટનને નક્કી કરવાની સત્તા મળી શકે છે કે આગામી બોલનો સામનો કયો બેટ્સમેન કરશે. આ ઉપરાંત ડેડ બોલ અંગેનો નિયમ પણ બદલાશે. હવે બોલને ડેડ જાહેર કરવા માટે તે માત્ર બોલર અથવા વિકેટકીપરના કબજામાં હોવો જરૂરી રહેશે નહીં. જો બોલ કોઈ ફિલ્ડરના હાથમાં હોય અથવા મેદાન પર પડી ગયો હોય અને રમતની સ્થિતિ પ્રમાણે તે સક્રિય ન રહ્યો હોય, તો તેને ડેડ ગણવામાં આવી શકે છે. આ ફેરફારથી અમ્પાયરોને પરિસ્થિતિ અનુસાર નિર્ણય લેવામાં વધુ સ્પષ્ટતા મળશે.

વનડે અને T20 ક્રિકેટમાં લેગ સાઈડ વાઈડને લઈને નવી માર્ગદર્શિકા લાગુ કરવામાં આવશે. આથી બેટ્સમેનની સ્થિતિ અને બોલની દિશા પ્રમાણે વાઈડ અંગેના નિર્ણયમાં વધુ સ્પષ્ટતા આવી શકે છે. સાથે જ બોલ ફેંકવામાં આવે તે ક્ષણે તમામ ફિલ્ડરો બાઉન્ડ્રીની અંદર હોવા જરૂરી રહેશે. આ નિયમથી ફિલ્ડિંગ પ્લેસમેન્ટમાં અમ્પાયરોની નજર વધુ કડક રહેશે. વિકેટકીપર માટે પણ એક રાહતભર્યો ફેરફાર કરવામાં આવ્યો છે. બોલર રન-અપ લેતો હોય ત્યારે વિકેટકીપર પોતાના ગ્લોવ્ઝ આગળ રાખે તો હવે તેના પર અગાઉની જેમ દંડ લાગુ નહીં થાય. આ સાતેય ફેરફારો ભારતીય ઘરેલુ ક્રિકેટમાં રમતની પ્રક્રિયાને વધુ સ્પષ્ટ અને આધુનિક બનાવવાના પ્રયાસ તરીકે જોવામાં આવી રહ્યા છે.