નવી દિલ્‍હીઃ વૈશ્વિક ક્રિકેટ જગતમાં ભારત અને પાકિસ્‍તાન વચ્‍ચેની મેચ હંમેશા કરોડો રૂપિયાની કમાણી અને રેકોર્ડબ્રેક વ્‍યુઅરશિપની ગેરંટી માનવામાં આવે છે. હવે આ જ હાઈ-વોલ્‍ટેજ મેચની ‘‘લાલચ'' અથવા તો આર્થિક ફાયદાને ધ્‍યાનમાં રાખીને આંતરરાષ્‍ટ્રીય ક્રિકેટ કાઉન્‍સિલ એક બહુ મોટો નિર્ણય લેવાની તૈયારી કરી રહ્યું હોવાના અહેવાલો સામે આવ્‍યા છે. ક્રિકેટ ચાહકોને આ બંને કટ્ટર હરીફો વચ્‍ચે વધુને વધુ મેચો જોવા મળે તે માટે આઇસીસી દ્વારા આગામી વન-ડે અને ટી૨૦ વર્લ્‍ડ કપના મૂળભૂત ફોર્મેટમાં જ મોટા ફેરફારો કરવાની યોજના ઘડવામાં આવી રહી છે.

સામાન્‍ય રીતે રાજદ્વારી તણાવને કારણે ભારત અને પાકિસ્‍તાન વચ્‍ચે કોઈ દ્વિપક્ષીય સિરીઝ રમાતી નથી, જેના કારણે ક્રિકેટ રસિયાઓ માત્ર આઇસીસી ટૂર્નામેન્‍ટ્‍સ પર જ નિર્ભર રહે છે. આ પરિસ્‍થિતિનો મહત્તમ વ્‍યાપારી લાભ ઉઠાવવા માટે આઇસીસી એવું ફોર્મેટ તૈયાર કરી રહ્યું છે જેમાં ગમે તે સમીકરણો બને તો પણ ભારત અને પાકિસ્‍તાન વચ્‍ચે ટૂર્નામેન્‍ટની શરૂઆતમાં જ એક મેચ પાકી થઈ જાય. આ આયોજનને કારણે ભવિષ્‍યમાં રમાનારા આઈસીસી વન-ડે વર્લ્‍ડ કપ અને ટી૨૦ વર્લ્‍ડ કપના ગ્રુપ સ્‍ટેજ અથવા નોક-આઉટ સ્‍ટેજના નિયમો સંપૂર્ણપણે બદલાઈ શકે છે. આઇસીસી સત્તાવાર રીતે આ મેગા ફેરફારોની જાહેરાત કરે તે પછી ક્રિકેટ જગતમાં નવો વળાંક જોવા મળી શકે છે.