નવી દિલ્હી, તા. ૦૮: ભારતીય ક્રિકેટના ૧૫ વર્ષીય યુવા સનસનાટી વૈભવ સૂર્યવંશીએ પોતાની અદ્ભુત બેટિંગથી સમગ્ર ક્રિકેટ જગતમાં ભારે ઉત્સાહ અને ચર્ચા જગાવી છે. આ દરમિયાન ભારતીય ક્રિકેટ ટીમના પૂર્વ સુકાની કપિલ દેવે યુવા ખેલાડીને અતિશય આત્મવિશ્વાસ અને સ્ટારડમથી દૂર રહીને પોતાની રમત પર ધ્યાન કેન્દ્રિત કરવા કડક સૂચના આપી છે.

વૈભવે માત્ર ૧૩ વર્ષની વયે આઈપીએલમાં પ્રવેશ કર્યો હતો અને પોતાના શાનદાર પ્રદર્શનથી ખૂબ ઝડપથી આંતરરાષ્ટ્રીય સ્તરે નામના મેળવી લીધી છે. ૨૦૨૬ની આઈપીએલ સિઝનમાં તેણે અસાધારણ પ્રદર્શન કરતા ૭૭૬ રન ફટકાર્યા હતા અને સૌથી વધુ ૭૨ છગ્ગા મારવાનો રેકોર્ડ પણ નોંધાવ્યો હતો. આ ઉપરાંત અંડર-૧૯ વર્લ્ડ કપની ફાઇનલમાં ૮૦ બોલમાં ૧૭૫ રનની અણનમ ઇનિંગ રમીને પોતાની ક્ષમતા સાબિત કરી હતી.

યુવા ખેલાડીને મળી રહેલી આ પ્રારંભિક સફળતાઓ છતાં કપિલ દેવે તેના ભવિષ્ય અંગે સાવચેતીભર્યો દ્રષ્ટિકોણ રજૂ કર્યો છે. કપિલ દેવના મતે વૈભવમાં અસાધારણ ક્ષમતા છે, પરંતુ ઉચ્ચ સ્તરે લાંબા સમય સુધી સફળ કારકિર્દી જાળવી રાખવા માટે માત્ર કુદરતી ટૅલન્ટ પૂરતી નથી હોતી, પરંતુ શિસ્ત અને સમર્પણ અત્યંત જરૂરી છે.

પોતાની વાતને મજબૂત કરવા માટે ૧૯૮૩ના વર્લ્ડ કપ વિજેતા કેપ્ટને પૂર્વ ખેલાડી વિનોદ કાંબળીનું ઉદાહરણ ટાંક્યું હતું. તેમણે જણાવ્યું હતું કે ભારતીય ક્રિકેટના ઇતિહાસમાં અદભુત પ્રતિભા ધરાવતા ઘણા ખેલાડીઓ આવ્યા હતા પરંતુ સમય જતાં તેઓ ગુમનામીમાં ખોવાઈ ગયા. કાંબળી જેવા દિગ્ગજ બેટ્સમેનનું પ્રારંભિક કરિયર ખૂબ જ તેજસ્વી હતું પરંતુ શિસ્તના અભાવે તેમની કારકિર્દી વહેલી પૂરી થઈ ગઈ હતી.

કપિલ દેવે વધુમાં જણાવ્યું હતું કે વૈભવ હજુ ખૂબ જ નાની વયનો છે અને આગામી ત્રણ વર્ષ તેની કારકિર્દી માટે અત્યંત નિર્ણાયક સાબિત થશે. વધતી ઉંમર સાથે તેની લાઈફસ્ટાઈલ અને માનસિકતામાં ફેરફાર આવશે, જેના પર કાબૂ રાખવો જરૂરી બનશે. આ સમયગાળા દરમિયાન તેના રન કે આંકડા કરતાં તેનો વ્યક્તિગત વિકાસ અને શિસ્ત વધુ મહત્વપૂર્ણ બની રહેશે.

વિનોદ કાંબળી એક સમયે વિશ્વના શ્રેષ્ઠ બેટ્સમેનોમાં ગણાતા હતા અને તેમને ભારત વતી લાંબી કારકિર્દી બનાવવાની વિપુલ તકો મળી હતી. જોકે, ખરાબ સંગત અને ખોટી આદતોના કારણે તેમની આશાસ્પદ કારકિર્દીનો અકાળે અંત આવ્યો હતો. આ ભૂતકાળના ઉદાહરણ પરથી બોધપાઠ લઈને યુવા ખેલાડીઓએ રમત પ્રત્યે સમર્પણ જાળવી રાખવું જરૂરી છે.