લંડન : આઇસીસી વિમેન્‍સ ટી૨૦ વર્લ્‍ડ કપ ૨૦૨૬ના રોમાંચક ફાઇનલ મુકાબલામાં ઓસ્‍ટ્રેલિયાએ ફરી એકવાર ક્રિકેટ જગતમાં પોતાનું એકચક્રી શાસન અને આધિપત્‍ય સાબિત કરી દીધું છે. ક્રિકેટના મક્કા ગણાતા લંડનના ઐતિહાસિક લોર્ડ્‍સ મેદાન પર રમાયેલી હાઇ-વોલ્‍ટેજ ફાઇનલ મેચમાં ઓસ્‍ટ્રેલિયાએ યજમાન ઇંગ્‍લેન્‍ડને તેના જ ઘરઆંગણે ૭ વિકેટે કરારી હાર આપીને ચમકતી વિશ્વ કપ ટ્રોફી પોતાના નામે કરી લીધી છે.

ટોસ હારીને પહેલા બેટિંગ કરવા ઉતરેલી ઇંગ્‍લેન્‍ડની ટીમ નિર્ધારિત ૨૦ ઓવરમાં ૪ વિકેટ ગુમાવીને ૧૫૦ રન જ બનાવી શકી હતી, જેમાં કેપ્‍ટન નેટ સાઇવર-બ્રન્‍ટના અણનમ ૫૮ અને ફ્રેયા કેમ્‍પના આક્રમક અણનમ ૪૪ રન મુખ્‍ય હતા. બંને વચ્‍ચે પાંચમી વિકેટ માટે ૮૦ રનની અણનમ ભાગીદારી થઈ હતી, કારણ કે તે પહેલા એમી જોન્‍સ (૬), ડેની વ્‍યાટ-હોજ (૮) અને હીથર નાઇટ (૨) જેવી સ્‍ટાર પ્‍લેયર્સ સસ્‍તામાં આઉટ થઈ ગઈ હતી. ઓસ્‍ટ્રેલિયા તરફથી શાનદાર લાઈન-લેન્‍થ સાથે બોલિંગ કરતા કિમ ગાર્થ, લુસી હેમિલ્‍ટન, સોફી મોલિનક્‍સ અને એનાબેલ સધરલેન્‍ડે ૧-૧ વિકેટ ઝડપીને ઇંગ્‍લેન્‍ડને મોટા સ્‍કોર તરફ જતા રોકયું હતું.

૧૫૧ રનના પડકારજનક ટાર્ગેટનો પીછો કરવા ઉતરેલી ઓસ્‍ટ્રેલિયાની શરૂઆત નબળી રહી હતી અને બીજી જ ઓવરમાં ઓપનર જોર્જિયા વોલ માત્ર વ્‍યક્‍તિગત ૧ રન પર આઉટ થઈ ગઈ હતી, પરંતુ ત્‍યારબાદ મેદાન પર બેથ મૂની અને ફોએબે લિચફિલ્‍ડનું વાવાઝોડું ફૂંકાયું હતું. આ બંને ડાબોડી બેટર્સની જોડીએ ઇંગ્‍લેન્‍ડના બોલિંગ આક્રમણના લીરેલીરા ઉડાડતા બીજી વિકેટ માટે માત્ર ૬૨ બોલમાં ૧૦૦ રનની મેચ વિનિંગ ભાગીદારી કરી નાખી, જેણે ઇંગ્‍લેન્‍ડની જીતની તમામ આશાઓ પર પાણી ફેરવી દીધું હતું. વિસ્‍ફોટક બેટિંગ કરતા લિચફિલ્‍ડે માત્ર ૩૫ બોલમાં ૬ ચોગ્‍ગા અને ૨ છગ્‍ગાની મદદથી ધમાકેદાર ૪૮ રન ફટકાર્યા હતા, જ્‍યારે અનુભવી વિકેટકીપર બેટર બેથ મૂનીએ ૪૯ બોલમાં ૧૦ આકર્ષક ચોગ્‍ગા સાથે ૬૪ રનનું મેચ વિનિંગ યોગદાન આપ્‍યું હતું. આ બંનેના આઉટ થયા બાદ મહાન ઓલરાઉન્‍ડર એલિસ પેરી (૧૩ અણનમ) અને એશ્‍લે ગાર્ડનર (૩ અણનમ)ની જોડીએ ઓસ્‍ટ્રેલિયાને ૧૭.૧ ઓવરમાં ૩ વિકેટના ભોગે આસાનીથી લક્ષ્ય સુધી પહોંચાડી વિજય અપાવ્‍યો હતો.

સોફી મોલિનક્‍સની કપ્તાની હેઠળ અજેય રહેલી આ કાંગારુ ટીમે મહિલા ટી૨૦ ક્રિકેટના ઇતિહાસમાં રેકોર્ડ ૭મી વખત (૨૦૧૦, ૨૦૧૨, ૨૦૧૪, ૨૦૧૮, ૨૦૨૦, ૨૦૨૩ અને ૨૦૨૬) આ પ્રતિષ્‍ઠિત ખિતાબ જીતીને નવો કીર્તિમાન સ્‍થાપિત કર્યો છે.