ચેન્નઈ : ભારતીય ટેસ્ટ ક્રિકેટ ટીમમાં સ્થાન મેળવવા માટે વધતી જતી તીવ્ર સ્પર્ધા વચ્ચે કર્ણાટકના યુવા બેટ્સમેન દેવદત્ત પડિક્કલે અત્યંત મહત્વનું નિવેદન આપ્યું છે. તાજેતરમાં શ્રીલંકા પ્રવાસ દરમિયાન સતત બે સદી સાથે ત્રણ ઇનિંગ્સમાં ૩૨૮ રનનો જંગી સ્કોર બનાવવા છતાં પડિક્કલે સ્પષ્ટ કર્યું છે કે ટીમમાં તકો ખૂબ જ મર્યાદિત મળે છે, જેથી કોઈપણ ખેલાડીએ પોતાની સફળતાને હળવાશથી લેવી જોઈએ નહીં.

વાસ્તવમાં નિયમિત નંબર ત્રણ બેટ્સમેન સાઈ સુદર્શનને પગમાં ઈજા થતાં પડિક્કલને પ્લેઈંગ ઈલેવનમાં તક મળી હતી, જેને તેણે બે હાથે ઝડપી લીધી હતી. પડિક્કલે જણાવ્યું કે, “ટેસ્ટ ક્રિકેટ સરળ ફોર્મેટ નથી. જો તમારે ટીમમાં ટકી રહેવું હોય તો દિવસ-રાત સતત રન બનાવીને ટીમની જીતમાં શ્રેષ્ઠ યોગદાન આપવું પડે. જ્યાં સુધી હું રન બનાવતો રહીશ ત્યાં સુધી ટીમમાં મારું સ્થાન સુરક્ષિત રહેશે તેનો મને આત્મવિશ્વાસ છે.” તેણે ઉમેર્યું કે નવેમ્બર ૨૦૨૪ માં પર્થ ટેસ્ટ બાદ તેને હવે તક મળી હતી, પરંતુ ટીમ મેનેજમેન્ટે તેને શ્રેણી શરૂ થાય તે પહેલાં જ તેની ભૂમિકા વિશે સ્પષ્ટ કરી દીધું હતું.

પોતાની આ શાનદાર સફળતાનો શ્રેય ભારતીય ટીમના ભૂતપૂર્વ મુખ્ય કોચ અને મહાન બેટ્સમેન રાહુલ દ્રવિડને આપતાં બેંગલુરુના આ બેટ્સમેને જણાવ્યું કે, ૨૦૨૪ ની શરૂઆતમાં ઇંગ્લેન્ડ સામે ડેબ્યૂ કર્યા બાદથી જ તેને દ્રવિડ સાહેબનું માર્ગદર્શન મળતું રહ્યું છે. લાંબો સમય ક્રીઝ પર કેવી રીતે ટકી રહેવું અને મેચ માટે માનસિક સ્પષ્ટતા કેવી રીતે કેળવવી તે અંગે દ્રવિડ સાથે થયેલી ચર્ચાઓ તેના માટે ખૂબ જ ઉપયોગી સાબિત થઈ છે.