નવી દિલ્હી: રાજસ્થાનના પ્રખ્યાત ટ્રાયથ્લીટ રાજેન્દ્ર ભાસ્કરે ફરી એકવાર આંતરરાષ્ટ્રીય સ્તરે દેશ અને રાજ્યનું નામ રોશન કર્યું છે. ફ્રાન્સના લોયર વેલીના ટુર્સ મેટ્રોપોલ ખાતે યોજાયેલી વિશ્વની સૌથી અઘરી ગણાતી 'આયર્નમેન સ્પર્ધા' તેમણે માત્ર ૧૦ કલાક, ૬ મિનિટ અને ૩૧ સેકન્ડમાં પૂર્ણ કરીને આ પ્રતિષ્ઠિત ખિતાબ પોતાના નામે કર્યો છે. રાજેન્દ્ર ભાસ્કર આ સાથે જ રાજસ્થાનના સૌથી ઝડપી 'આયર્નમેન' બન્યા છે. આ વૈશ્વિક સ્પર્ધામાં વિશ્વભરના ૯૦ દેશોના દિગ્ગજ એથ્લેટ્સોએ ભાગ લીધો હતો. રાજેન્દ્રએ કુલ ૨૨૬ કિલોમીટરનો અત્યંત કઠિન પડકાર કોઈ પણ વિરામ વગર સફળતાપૂર્વક પૂર્ણ કર્યો હતો. તેમણે આ રેસના ત્રણેય તબક્કા નીચે મુજબના શાનદાર સમયમાં પૂર્ણ કર્યા હતા:
સ્વિમિંગ (૩.૮ કિમી): ૧ કલાક, ૨૭ મિનિટ અને ૫૫ સેકન્ડ
સાયકલિંગ (૧૮૦ કિમી): ૫ કલાક, ૦૦ મિનિટ અને ૧૮ સેકન્ડ
મેરેથોન દોડ (૪૨.૨ કિમી): ૩ કલાક, ૨૬ મિનિટ અને ૫૩ સેકન્ડ
આ અગાઉ વર્ષ ૨૦૧૯માં તુર્કીમાં યોજાયેલી 'આયર્નમેન ૭૦.૩' સ્પર્ધાને માત્ર ૪ કલાક અને ૨૯ મિનિટમાં પૂર્ણ કરીને રાજેન્દ્ર રાજસ્થાનના સૌથી ઝડપી 'હાફ આયર્નમેન' બન્યા હતા. તેઓ નેશનલ ગેમ્સમાં પણ રાજસ્થાનનું પ્રતિનિધિત્વ કરી ચૂક્યા છે અને ચેન્નાઈ ટ્રાયથલોન પણ જીતી ચૂક્યા છે. હાલ તેઓ ભારતની ઓલ-ટાઇમ ટોપ-૫ એથ્લેટ્સની યાદીમાં સામેલ છે.