નવી દિલ્હી : ઇન્ડિયન પ્રીમિયર લીગ (IPL) 2026માં દિલ્હી કેપિટલ્સ અને પંજાબ કિંગ્સ વચ્ચે રમાયેલી રોમાંચક મેચ દરમિયાન એક ચિંતાજનક દ્રશ્ય જોવા મળ્યું હતું. દિલ્હી કેપિટલ્સના ઝડપી બોલર લુંગી ન્ગીડી ફિલ્ડિંગ કરતી વખતે માથાના ભાગે ગંભીર રીતે ઈજાગ્રસ્ત થયા હતા. આ ઘટના બાદ મેદાન પર અફરાતફરીનો માહોલ સર્જાયો હતો અને રમતને થોડા સમય માટે રોકવી પડી હતી. જોકે, હવે ન્ગીડીની તબિયત અંગે રાહતના સમાચાર સામે આવ્યા છે.

    શું બની હતી ઘટના?   

પંજાબ કિંગ્સની ઇનિંગની ત્રીજી ઓવર દરમિયાન પ્રિયાંશ આર્યાએ એક જોરદાર શોટ ફટકાર્યો હતો. આ કેચ પકડવાના પ્રયાસમાં લુંગી ન્ગીડી દોડ્યો હતો, પરંતુ સંતુલન ગુમાવતા તે પાછળની તરફ પટકાયો હતો. આ દરમિયાન તેમનું માથું જમીન સાથે જોરથી અથડાયું હતું. ઈજા એટલી ગંભીર હતી કે તેમને તાત્કાલિક સ્ટ્રેચર પર મેદાનની બહાર લઈ જવામાં આવ્યા હતા અને એમ્બ્યુલન્સ દ્વારા કરોલ બાગની મેક્સ હોસ્પિટલમાં ખસેડવામાં આવ્યા હતા.

    ડિરેક્ટરે શું કહ્યું?   

મેચ બાદ દિલ્હી કેપિટલ્સના ક્રિકેટ ડિરેક્ટર વેણુગોપાલ રાવે ન્ગીડીની સ્વાસ્થ્ય સ્થિતિ પર મહત્વનું અપડેટ આપતા જણાવ્યું હતું કે, "પ્રારંભિક રિપોર્ટ્સ મુજબ ઈજા ખૂબ ગંભીર નથી. હાલમાં તેઓ હોસ્પિટલમાં નિરીક્ષણ હેઠળ છે અને તેમની સ્થિતિ સ્થિર છે." દિલ્હી કેપિટલ્સના સત્તાવાર સોશિયલ મીડિયા હેન્ડલ પરથી પણ એવો સંકેત આપવામાં આવ્યો હતો કે તેમને ટૂંક સમયમાં હોસ્પિટલમાંથી રજા આપવામાં આવી શકે છે.

    ટીમને પડી ખોટ   

વેણુગોપાલ રાવે સ્વીકાર્યું હતું કે ન્ગીડીની ગેરહાજરી દિલ્હી માટે ભારે પડી હતી. ટીમે 264 રનનો મજબૂત સ્કોર બનાવ્યો હોવા છતાં, ન્ગીડીના 4 ઓવરના ક્વોટાના અભાવે ટીમ લક્ષ્યાંકનો બચાવ કરી શકી નહોતી. નિયમોને ધ્યાનમાં રાખીને ટીમ દ્વારા 'કન્કશન સબસ્ટિટ્યુટ' તરીકે વિપ્રજ નિગમને મેદાનમાં ઉતારવામાં આવ્યો હતો.

આ ઘટના બાદ ક્રિકેટ જગતમાં ન્ગીડીના ઝડપી સ્વસ્થ થવા માટે પ્રાર્થનાઓનો દોર શરૂ થયો છે.