અમદાવાદ : આઈપીએલ 2026ના 25મા મુકાબલામાં ગુજરાત ટાઇટન્સે પોતાના હોમ ગ્રાઉન્ડ નરેન્દ્ર મોદી સ્ટેડિયમ ખાતે કોલકાતા નાઇટ રાઇડર્સ (KKR) સામે શાનદાર વિજય મેળવ્યો છે. શુભમન ગિલની કપ્તાની હેઠળની ટીમે 181 રનનો પીછો કરતા 5 વિકેટે મેચ જીતી લીધી હતી. આ જીત સાથે ગુજરાતની ટીમે ટૂર્નામેન્ટમાં પોતાની લય જાળવી રાખી છે, જ્યારે KKR માટે પરાજયનો સિલસિલો યથાવત રહ્યો છે.

શુભમન ગિલની કેપ્ટન ઇનિંગ:

પ્રથમ બેટિંગ કરતા કોલકાતા નાઇટ રાઇડર્સે 20 ઓવરમાં 180 રન બનાવી ઓલઆઉટ થઈ ગઈ હતી. 181 રનના લક્ષ્યાંકનો પીછો કરવા ઉતરેલી ગુજરાતની ટીમ તરફથી કેપ્ટન શુભમન ગિલે મોખરે રહીને નેતૃત્વ કર્યું હતું. ગિલે શાનદાર 86 રન ફટકારીને ટીમને જીતની નજીક પહોંચાડી હતી. અંતમાં ગુજરાતે 19.4 ઓવરમાં 5 વિકેટ ગુમાવીને આ લક્ષ્યાંક હાંસલ કરી લીધો હતો. જેસી બટલરની ફોર્મમાં વાપસી પણ ગુજરાત માટે આ મેચમાં મોટું જમા પાસું સાબિત થઈ હતી.

KKRની કથળતી હાલત:

અજિંક્ય રહાણેની કેપ્ટનશીપ હેઠળ રમી રહેલી KKRની ટીમ માટે આ સીઝન અત્યાર સુધી અત્યંત નિરાશાજનક રહી છે. ટીમ 5 મેચમાં માત્ર એક જ પોઈન્ટ સાથે પોઈન્ટ ટેબલમાં સૌથી નીચેના સ્થાને છે. આ મેચમાં ટીમની બેટિંગ અને બોલિંગ બંનેમાં સાતત્યનો અભાવ જોવા મળ્યો હતો. સુનીલ નરેન અને કેમરૂન ગ્રીન જેવા દિગ્ગજ ખેલાડીઓ હોવા છતાં ટીમ સ્કોરને બચાવવામાં નિષ્ફળ રહી હતી. હેડ-ટુ-હેડ રેકોર્ડમાં પણ હવે ગુજરાત 4-1થી આગળ નીકળી ગયું છે.

બંને ટીમોની પ્લેઈંગ ઈલેવન

  ગુજરાત ટાઇટન્સ: શુભમન ગિલ (કેપ્ટન), સાઈ સુદર્શન, જોસ બટલર, વોશિંગ્ટન સુંદર, ગ્લેન ફિલિપ્સ, રાહુલ તેવટિયા, રાશિદ ખાન, અશોક શર્મા, કૈગિસો રબાડા, મોહમ્મદ સિરાજ અને પ્રસિદ્ધ ક્રિષ્ના.

  કોલકાતા નાઇટ રાઇડર્સ: ટિમ સીફર્ટ, સુનીલ નરેન, અજિંક્ય રહાણે (કેપ્ટન), કેમરૂન ગ્રીન, અંગકૃષ રઘુવંશી, રોવમેન પોવેલ, રિંકુ સિંહ, રમનદીપ સિંહ, અનુકૂલ રોય, વૈભવ અરોડા અને કાર્તિક ત્યાગી.

અમદાવાદના મેદાન પર 2023માં રિંકુ સિંહે મારેલા પાંચ છક્કાની યાદો KKR માટે આ વખતે પ્રેરણાસ્ત્રોત બની શકી નહોતી. ગુજરાતની સંતુલિત બોલિંગ સામે KKRના બેટ્સમેનો મોટો સ્કોર કરવામાં નિષ્ફળ રહ્યા અને અંતે ગુજરાતે બાજી મારી લીધી હતી.