જકાર્તા (ઇન્ડોનેશિયા): જકાર્તામાં રમાઈ રહેલી પ્રતિષ્ઠિત BWF સુપર 1000 ટુર્નામેન્ટ, 'ઇન્ડોનેશિયા ઓપન'માં આજે ભારતીય શટલર્સ માટે મિશ્ર પરિણામો રહ્યા હતા. ભારતના બેડમિન્ટન સ્ટાર અને ટુ-ટાઈમ ઓલિમ્પિક મેડાલિસ્ટ પીવી સિંધુએ ફરી એકવાર પોતાની ક્ષમતા સાબિત કરી છે. ઓક્ટોબર 2023 બાદ પ્રથમ વખત વિશ્વના ટોચના 10 ખેલાડીઓમાં સ્થાન મેળવ્યા બાદ, સિંધુએ ખૂબ જ આત્મવિશ્વાસ સાથે મેદાનમાં પ્રવેશ કર્યો હતો. ઓપનિંગ મેચમાં તેમણે થાઈલેન્ડના મજબૂત ખેલાડી બુસાનન ઓંગબામરુંગફાન સામે કઠિન સંઘર્ષ બાદ વિજય મેળવીને બીજા રાઉન્ડમાં પોતાની જગ્યા સુરક્ષિત કરી લીધી છે.
લક્ષ્ય સેન માટે આઘાતજનક વિદાય
જ્યાં એક તરફ સિંધુનો વિજય ભારતીય ચાહકો માટે ખુશી લઈને આવ્યો હતો, ત્યાં પુરુષ સિંગલ્સમાં ઉભરતા સ્ટાર લક્ષ્ય સેન માટે આ દિવસ નિરાશાજનક રહ્યો. પ્રારંભિક રાઉન્ડમાં જ હારનો સામનો કરવો પડતા લક્ષ્ય સેન ટુર્નામેન્ટમાંથી બહાર થઈ ગયો છે, જે ભારતીય ટીમને માટે મોટો ઝટકો માનવામાં આવે છે.
આજની અન્ય મહત્વપૂર્ણ મેચો પર નજર
આજે દિવસ દરમિયાન અન્ય ભારતીય ખેલાડીઓ પણ કોર્ટ પર પોતાનું કૌશલ્ય બતાવશે:
•    પુરુષ સિંગલ્સ: એચ.એસ. પ્રણોય આયર્લેન્ડના ન્હાટ ન્ગુયેન સામે ટકરાશે, જ્યારે આયુષ શેટ્ટી ચીનના વેંગ હોંગયાંગ સામે પોતાનું કૌવત બતાવશે.
•    પુરુષ ડબલ્સ: ભારતની આશાસ્પદ જોડી સાત્વિકસાઈરાજ રંકીરેડ્ડી અને ચિરાગ શેટ્ટી મલેશિયાના ખાઈ ઝિંગ કાંગ અને એરોન તાઈ સામે પોતાના અભિયાનનો પ્રારંભ કરશે.
•    મિશ્ર ડબલ્સ: રોહન કપૂર અને રૂત્વિકા શિવાની ગડ્ડે તાઈવાનની જોડી હુ લિંગ-ફેંગ અને યાંગ પો-હસુઆન સામે મુકાબલો કરશે.
ભારતીય ટીમ માટે આ ટુર્નામેન્ટ હવે નિર્ણાયક વળાંક પર છે, અને પીવી સિંધુ પાસે પોતાની સફળતાની ગતિને જાળવી રાખવાની મોટી તક છે.