મુંબઈ : એશિયન્સ ગેમ્સ ૨૦૨૬ની હોકી ફાઈનલમાં ભારતીય મહિલા હોકી ટીમે ઈતિહાસ રચતાં ચીનને ૧-૦થી માત આપીને પૂરા ૪૪ વર્ષ બાદ ગોલ્ડ મેડલ પર પોતાનો કબજો જમાવ્યો છે. આ ઐતિહાસિક જીતની સાથે જ ભારતીય મહિલા ટીમે વર્ષ ૨૦૨૮માં રમાનારા લોસ એન્જલસ ઓલિમ્પિક માટે પણ સીધું ક્વોલિફિકેશન મેળવી લીધું છે. ભારતે આ અગાઉ છેલ્લે ૧૯૮૨માં દિલ્હી એશિયન ગેમ્સમાં મહિલા હોકીમાં ગોલ્ડ મેડલ જીત્યો હતો.

ટ્રાફિક જામના કારણે મેચ ૪૫ મિનિટ મોડી શરૂ થઈ

શુક્રવારે રમાયેલી આ હાઈ-વોલ્ટેજ ફાઈનલ મેચ અગાઉ બપોરે ૩:૩૦ વાગ્યે શરૂ થવાની હતી, પરંતુ સ્ટેડિયમ જવાના રૂટ પર થયેલા માર્ગ અકસ્માતને કારણે ભારે ટ્રાફિક જામ સર્જાયો હતો અને બંને ટીમોની બસ ફસાઈ ગઈ હતી. પરિણામે મેચ ૪૫ મિનિટના વિલંબ બાદ બપોરે ૪:૧૫ વાગ્યે શરૂ થઈ શકી હતી.

લાલરેમસિયામીનો નિર્ણાયક ગોલ અને સવિતા પુનિયાની 'દીવાલ'

મેચની શરૂઆતથી જ ભારતીય ટીમે આક્રમક વલણ અપનાવ્યું હતું. મેચની ૧૦મી મિનિટમાં લાલરેમસિયામીએ શાનદાર ગોલ કરીને ભારતને ૧-૦ની સરસાઈ અપાવી હતી. બીજા ક્વાર્ટરમાં ચીને વળતો પ્રહાર કરીને અનેક પેનલ્ટી કોર્નર મેળવ્યા હતા, પરંતુ ભારતીય ગોલકીપર સવિતા પુનિયાએ ચીનનો પેનલ્ટી સ્ટ્રોક અદ્ભુત રીતે બચાવીને ચીનની ગોલ કરવાની આશા પર પાણી ફેરવી દીધું હતું.

કેપ્ટન સલીમા ટેટે ઘાયલ, છતાં ટીમે ન ગુમાવ્યો જુસ્સો

ત્રીજા ક્વાર્ટર દરમિયાન ભારતીય મહિલા હોકી ટીમની કેપ્ટન સલીમા ટેટે હાથમાં ગંભીર ઈજા થવાને કારણે મેદાન બહાર જવું પડ્યું હતું. કેપ્ટનની ઈજા છતાં ભારતીય મહિલાઓએ પોતાના બુલંદ જુસ્સા સાથે ચીની ટીમના તમામ આક્રમણોને નિષ્ફળ બનાવ્યા હતા અને અંત સુધી ૧-૦ની લીડ જાળવી રાખીને સુવર્ણચંદ્રક પોતાના નામે કર્યો હતો.

એશિયન ગેમ્સ ૨૦૨૬માં ભારતની ગોલ્ડન સફર

ભારતે આ સમગ્ર ટૂર્નામેન્ટમાં અજેય રહીને ગોલ્ડ જીત્યો છે. પૂલ B લીગ મેચોમાં ભારતે ઉઝબેકિસ્તાનને ૧૯-૦, ઇન્ડોનેશિયાને ૧૭-૧, થાઇલેન્ડને ૨૦-૧ અને સિંગાપોરને ૭-૦થી કચડી નાખ્યું હતું. સેમિફાઇનલમાં દક્ષિણ કોરિયાને ૨-૦થી હરાવ્યા બાદ ફાઇનલમાં ડિફેન્ડિંગ ચેમ્પિયન ચીનને ૧-૦થી ધૂળ ચાટતી કરી ભારતની સિંઘણોએ ભારત દેશનું નામ વિશ્વભરમાં રોશન કર્યું છે.