નવી દિલ્હી, તા.10: ૨૦૨૬ મહિલા જુનિયર એશિયા કપ હોકી ટૂર્નામેન્ટમાં ભારતીય મહિલા ટીમે વિરોધી પાકિસ્તાન સામે ઐતિહાસિક અને આક્રમક વિજય નોંધાવીને સેમિફાઇનલમાં પોતાનું સ્થાન પાકું કરી લીધું છે. ક્વાર્ટર ફાઇનલના મહામુકાબલામાં ભારતે પાકિસ્તાનને ૧૯-૦થી ધૂળ ચાટતી કરીને ટૂર્નામેન્ટની સૌથી મોટી અને યાદગાર જીત હાંસલ કરી છે. આ વિસ્ફોટક જીત સાથે જ ડિફેન્ડિંગ ચેમ્પિયન ભારત સતત ત્રીજો ખંડીય ખિતાબ જીતવાથી હવે માત્ર બે ડગલાં દૂર છે.

પ્રથમ હાફથી જ ભારતનો દબદબો; ૧૦-૦ની લીડ મેળવી

મેચની શરૂઆતથી જ ભારતીય ટીમે અવિરત હુમલા ચાલુ રાખ્યા હતા, જેના કારણે પાકિસ્તાની ટીમ સંપૂર્ણપણે દબાણમાં આવી ગઈ હતી. ૭મી મિનિટે પૂજા સાહૂએ પહેલો ગોલ કરીને ખાતું ખોલ્યું અને ત્યાર બાદ ગોલનો વરસાદ શરૂ થયો હતો. રોશની આઇન્ડે, તનુશ્રી કાડુ, સુખવીર કૌર, સાનિકા માને, મધુ સિદાર, ગીતા યાદવ, તનુજા ટોપ્પો અને પૂજા મલિકના સતત ગોલની મદદથી હાફ-ટાઇમ સુધીમાં જ ભારતે ૧૦-૦ની અજેય લીડ મેળવી લીધી હતી.

પૂજા મલિકની હેટ્રિક અને અણનમ પ્રવાસ

બીજા હાફમાં પણ ભારતીય ખેલાડીઓનું આક્રમણ ચાલુ રહ્યું હતું. પૂજા મલિકે ૪૯મી અને ૫૧મી મિનિટે ગોલ કરીને પોતાની શાનદાર હેટ્રિક પૂર્ણ કરી હતી, જ્યારે સુપ્રિયા, કૃષ્ણા શર્મા અને બિનીમા ધને પણ સ્કોરબોર્ડમાં યોગદાન આપ્યું હતું. મેચની છેલ્લી મિનિટે રોશની આઇન્ડે પોતાનો બીજો ગોલ કરીને ભારતનો ૧૯-૦થી વિજય નિશ્ચિત કર્યો હતો. ગ્રુપ સ્ટેજમાં જાપાન, મલેશિયા અને દક્ષિણ કોરિયાને હરાવ્યા બાદ ભારતે આ શાનદાર જીત મેળવી છે અને હવે સેમિફાઇનલમાં દક્ષિણ કોરિયા-મલેશિયા ક્વાર્ટર ફાઇનલના વિજેતા સામે ટકરાશે.