નાગોયા, તા.22: જાપાનના નાગોયા શહેરમાં આયોજિત એશિયન પેરા ગેમ્સ ૨૦૨૬ માં ભારતીય ખેલાડીઓએ શૌર્ય અને ખેલદિલીનું અદભુત પ્રદર્શન કરીને સમગ્ર દેશનું ગૌરવ વધાર્યું છે. પેરા એથ્લેટિક્સ સ્પર્ધામાં ભારતની તેજસ્વી દોડવીર અંજનાબેન બુમ્બડિયાએ મહિલાઓની ૪૦૦ મીટર T47 સ્પર્ધામાં શાનદાર પ્રદર્શન કરતા ગૌરવવંતો 'ગોલ્ડ મેડલ' પોતાના નામે કર્યો છે, જ્યારે તેમની સાથી ખેલાડી જયંતી બેહેરાએ આ જ સ્પર્ધામાં 'સિલ્વર મેડલ' જીતીને પોડિયમ પર ભારતનો દબદબો સાબિત કર્યો છે.

આ રોમાંચક મુકાબલામાં અંજનાબેન બુમ્બડિયાએ અદ્ભુત ઝડપ અને સ્ટેમિના બતાવતા માત્ર ૫૯.૯૭ સેકન્ડમાં જ ૪૦0 મીટરનું અંતર કાપીને રેસ પૂરી કરી હતી. ખાસ વાત એ છે કે આ ચાર એથ્લેટ્સની ફાઇનલ રેસમાં અંજનાબેન એકમાત્ર એવી દોડવીર રહી હતી જેણે એક મિનિટથી ઓછા સમયમાં રેસ પૂર્ણ કરીને આ સિદ્ધિ હાંસલ કરી હતી. બીજી તરફ, ભારતના અન્ય એક પ્રતિભાશાળી ખેલાડી જયંતી બેહેરાએ ૧:૦૦.૬૫ સેકન્ડનો સમય નોંધીને સિલ્વર મેડલ જીતી લીધો હતો, જ્યારે થાઈલેન્ડની સાસિરાવાન ઈન્થાચોટે ૧:૦૨.૫૮ સેકન્ડના સમય સાથે બ્રોન્ઝ મેડલ મેળવ્યો હતો. (ઉલ્લેખનીય છે કે T47 શ્રેણી એવા ખેલાડીઓ માટે હોય છે જેમનો હાથ કોણી કે કાંડાથી પ્રભાવિત કે ક્ષતિગ્રસ્ત હોય છે).

આ ઉપરાંત, મહિલાઓની ૪૦૦ મીટર T12 સ્પર્ધામાં દ્રષ્ટિહીન એથ્લેટ તેજલબેન ડામોરે પણ અપ્રતિમ સાહસ દાખવતા ૫૭.૬૦ સેકન્ડના શાનદાર સમય સાથે સિલ્વર મેડલ પોતાના નામ કર્યો છે. વર્તમાન એશિયન પેરા ગેમ્સમાં તેજલબેનનો આ બીજો પદક છે; અગાઉ તેમણે ૨૦૦ મીટર T12 ઇવેન્ટમાં પણ બ્રોન્ઝ મેડલ જીતીને પોતાની શ્રેષ્ઠતા સાબિત કરી હતી.

ભારતીય પેરા એથ્લેટ્સની આ સતત સફળતા અને અદમ્ય ઉત્સાહને કારણે આંતરરાષ્ટ્રીય મંચ પર ભારતની પકડ વધુ મજબૂત બની છે અને દેશભરમાંથી વિજેતા ખેલાડીઓ પર અભિનંદનનો વરસાદ થઈ રહ્યો છે.