જકાર્તા : ઇન્ડોનેશિયાના જકાર્તામાં રમાઈ રહેલી એશિયન અંડર-૧૯ અને અંડર-૨૩ બોક્સિંગ ચેમ્પિયનશિપમાં ભારતીય મહિલા બોક્સરોએ પોતાના પંચના દમ પર ઇતિહાસ રચી દીધો છે. આજે રમાયેલી ફાઇનલ મેચોમાં શાનદાર પ્રદર્શન કરતા ભારતીય મહિલા મુક્કાબાજોએ કુલ ૩ ગોલ્ડ મેડલ (સુવર્ણચંદ્રક) અને ૧૦ સિલ્વર મેડલ (રજતચંદ્રક) જીતીને વૈશ્વિક મંચ પર તિરંગો લહેરાવ્યો છે.

અંડર-૧૯ કેટેગરીમાં ભારતીય દીકરીઓએ રિંગ ગજવી મૂકી હતી. જેમાં ચંદ્રિકા પૂજારીએ ૫૧ કિગ્રા વજન વર્ગમાં ઉઝબેકિસ્તાનની મજબૂત પ્રતિસ્પર્ધી નજોકાત મર્દોનોવાને ૫-૦ થી એકતરફી હરાવીને ભારતને પ્રથમ ગોલ્ડ મેડલ અપાવ્યો હતો. આ જ ઉત્સાહને આગળ ધપાવતા ૫૭ કિગ્રા વર્ગમાં પ્રાચીએ યજમાન ઇન્ડોનેશિયાની બોક્સર દિરા આર્ટિકાને ૫-૦ ના સ્કોરથી પરાસ્ત કરી બીજો ગોલ્ડ મેડલ દેશના નામે કર્યો હતો. આ ઉપરાંત અંડર-૧૯ કેટેગરીમાં ગુંજન (૪૫-૪૮ કિગ્રા), જોયશ્રી (૫૪ કિગ્રા), ચાહત (૬૦ કિગ્રા), અંશિકા (૭૫ કિગ્રા), મેઘા શ્યોકંદ (૮૦ કિગ્રા) અને પ્રાચી ટોકાસ (+૮૧ કિગ્રા) એ પોતપોતાની ફાઇનલમાં જોરદાર ટક્કર આપીને દેશ માટે સિલ્વર મેડલ જીત્યા હતા.

બીજી તરફ, અંડર-૨૩ કેટેગરીમાં પણ ભારતીય મુક્કાબાજોનો દબદબો જોવા મળ્યો હતો. ભારતની સ્ટાર બોક્સર નિશાએ ૫૪ કિગ્રા વજન વર્ગની રોમાંચક ફાઇનલ મેચમાં જાપાનની કોરીન કોકોફુને ૫-૦ ના સર્વસંમતિથી ધૂળ ચટાડીને ભારતની ઝોળીમાં ત્રીજો ગોલ્ડ મેડલ નાખ્યો હતો. આ સિવાય નીતિકા ચંદ (૬૦ કિગ્રા), કાજલ (૬૫ કિગ્રા), મુસ્કાન (૭૫ કિગ્રા) અને પ્રિયંકા (+૮૦ કિગ્રા) એ સિલ્વર મેડલ જીત્યા હતા. અગાઉ તનુ (૫૧ કિગ્રા), પ્રાચી (૫૭ કિગ્રા), શિવાની (૭૦ કિગ્રા) અને નૈના (૮૦ કિગ્રા) એ બ્રોન્ઝ મેડલ મેળવીને દેશનું ગૌરવ વધાર્યું હતું.

મહિલા બોક્સરોના આ ઐતિહાસિક વિજય બાદ હવે સમગ્ર દેશની નજર આવતીકાલે યોજાનારી પુરુષોની ફાઇનલ મેચો પર ટકેલી છે. આવતીકાલે અંડર-૨૩ કેટેગરીમાં ત્રણ ભારતીય બોક્સરો અને અંડર-૧૯ કેટેગરીમાં બે ભારતીય બોક્સરો સુવર્ણચંદ્રક જીતવાના મજબૂત ઈરાદા સાથે રિંગમાં ઉતરશે.