મુંબઈ :ભારતીય પુરુષ ક્રિકેટ ટીમના મુખ્ય કોચ અને પૂર્વ દિગ્ગજ ઓપનર ગૌતમ ગંભીરે બુધવારે રાજસ્થાનના પ્રસિદ્ધ સાલાસર બાલાજી મંદિરે મુલાકાત લઈ ભગવાન હનુમાનના આશીર્વાદ લીધા હતા. 2026 ના ટી-20 વર્લ્ડ કપમાં ભારતને ઐતિહાસિક વિજય અપાવ્યા બાદ ગંભીરની આ ધાર્મિક યાત્રાને ખૂબ જ મહત્વપૂર્ણ માનવામાં આવી રહી છે. ગંભીરે અહીં પરંપરાગત પૂજા-અર્ચના કરી દેશની સુખ-શાંતિ અને સમૃદ્ધિ માટે પ્રાર્થના કરી હતી. મંદિરના પૂજારી પરિવારે તેમનું ઉષ્માભર્યું સ્વાગત કરી વિધિવત પૂજા સંપન્ન કરાવી હતી.

ગૌતમ ગંભીરના માર્ગદર્શન હેઠળ ભારતીય ટીમે તાજેતરમાં જ ટી- 20 વર્લ્ડ કપ 2026ના ફાઈનલમાં ન્યૂઝીલેન્ડને હરાવીને પોતાના ટાઈટલનું સફળતાપૂર્વક જાળવી રાખ્યો છે. ભારત પોતાના દેશમાં આ ટ્રોફી જાળવી રાખનાર વિશ્વની પ્રથમ ટીમ બની છે. આ ભવ્ય સફળતા બાદ ગંભીર હવે આગામી પડકારો માટે તૈયારીઓ કરી રહ્યા છે. જૂન મહિનામાં અફઘાનિસ્તાન સામેની હોમ સિરીઝથી ભારતની નવી સીઝન શરૂ થશે, જેમાં એક ટેસ્ટ અને ત્રણ વન-ડે રમાવાની છે. ત્યારબાદ ટીમ આયર્લેન્ડ અને ઇંગ્લેન્ડના પ્રવાસે જશે.

ઉલ્લેખનીય છે કે ગંભીરનો હેડ કોચ તરીકેનો અત્યાર સુધીનો પ્રવાસ મિશ્ર રહ્યો છે. વ્હાઇટ બોલ ક્રિકેટમાં ભારતે ૨૦૨૫ની ચેમ્પિયન્સ ટ્રોફી, એશિયા કપ અને ૨૦૨૬નો ટી-૨૦ વર્લ્ડ કપ જીતીને વર્ચસ્વ જમાવ્યું છે. જોકે, ટેસ્ટ ક્રિકેટમાં ટીમને ન્યૂઝીલેન્ડ અને દક્ષિણ આફ્રિકા સામે ઘરઆંગણે શ્રેણી હારનો સામનો કરવો પડ્યો છે. હાલમાં ભારતીય ટીમ વર્લ્ડ ટેસ્ટ ચેમ્પિયનશિપના ટેબલમાં છઠ્ઠા ક્રમે છે, જે ગંભીર માટે ચિંતાનો વિષય છે. રિપોર્ટ્સ મુજબ, તેઓ હવે બીસીસીઆઈ પાસે 2028 સુધીના લાંબા ગાળાના કરારની માંગ કરી રહ્યા છે જેથી ટીમનું પુનઃનિર્માણ કરી શકાય.

ચુરુ જિલ્લામાં આવેલું સાલાસર બાલાજી મંદિર ભક્તો માટે અત્યંત આસ્થાનું કેન્દ્ર છે. અહીં હનુમાનજીની મૂર્તિ દાઢી અને મૂછ ધરાવતા અનોખા સ્વરૂપમાં બિરાજમાન છે. માનવામાં આવે છે કે આ મૂર્તિ આશરે 1755માં ખેડૂતના ખેતરમાંથી સ્વયંભૂ પ્રગટ થઈ હતી. ગૌતમ ગંભીર જેવી સેલિબ્રિટીની મુલાકાતથી સ્થાનિકોમાં પણ ભારે ઉત્સાહ જોવા મળ્યો હતો. આગામી સમયમાં ગંભીર સામે સૌથી મોટો પડકાર ટેસ્ટ ફોર્મેટમાં ટીમ ઈન્ડિયાના પ્રદર્શનને સુધારવાનો અને ૨૦૨૭ના વન-ડે વર્લ્ડ કપ માટે મજબૂત પાયો નાખવાનો રહેશે.