ભારત અને વેસ્ટ ઇન્ડિઝ વચ્ચે ત્રણ મેચની વન-ડે શ્રેણીનો પ્રથમ મુકાબલો આજે અત્યારે બપોરે બે વાગ્યાથી તિરુવનંતપુરમના ગ્રીનફિલ્ડ આંતરરાષ્ટ્રીય મેદાન પર શરૂ થઈ ગયો છે. પચાસ ઓવરની આ દિવસ-રાત્રિ મેચ સાથે ભારતના ઘરઆંગણાના ક્રિકેટ સત્રનો પ્રારંભ થયો છે.

ભારતીય ટીમનું સુકાન શુભમન ગિલ  સંભાળી રહેલ છે, જ્યારે લોકેશ રાહુલ ઉપકપ્તાન છે. રોહિત શર્મા અને વિરાટ કોહલીની વન-ડે ટીમમાં વાપસી થવાથી ભારતીય બેટિંગ વધુ મજબૂત બની છે. રવીન્દ્ર જાડેજા પણ ફરી વન-ડે ટીમમાં સામેલ થયો છે. નમન ધીર અને ઝડપી બોલર ઓકિબ નબીને પ્રથમ વખત ભારતીય વન-ડે ટીમમાં સ્થાન મળ્યું છે.

વેસ્ટ ઇન્ડિઝની આગેવાની વિકેટકીપર-બેટર શાઈ હોપ સંભાળે છે. તેની ટીમમાં જોન કેમ્પબેલ, કીસી કાર્ટી, રોસ્ટન ચેઝ, અલ્ઝારી જોસેફ, શમાર જોસેફ, ગુડાકેશ મોતી અને જેડન સીલ્સ જેવા ખેલાડીઓ સામેલ છે. બંને ટીમો માટે આ શ્રેણી વર્ષ ૨૦૨૭ના એકદિવસીય વિશ્વકપની તૈયારીના ભાગરૂપે મહત્ત્વપૂર્ણ રહેશે.

શ્રેણીની બીજી મેચ ૩૦ સપ્ટેમ્બરે ગુવાહાટીમાં અને ત્રીજી મેચ ૩ ઑક્ટોબરે ન્યૂ ચંડીગઢમાં રમાશે. 

તિરુવનંતપુરમમાં આજની મેચનો પ્રથમ તબક્કો બપોરે બે વાગ્યાથી સાંજે સાડા પાંચ વાગ્યા સુધી અને બીજો તબક્કો સાંજે છથી રાત્રે સાડા નવ વાગ્યા સુધી યોજાશે.