નવી દિલ્હી : સોશિયલ મીડિયા પર પોતાના રમુજી અને કટાક્ષપૂર્ણ ટ્વીટ્સ માટે જાણીતા આઈસલેન્ડ ક્રિકેટે આંતરરાષ્ટ્રીય ક્રિકેટના દિગ્ગજો પર ફરી એકવાર આકરો કટાક્ષ કર્યો છે. તાજેતરમાં વિવિધ વિવાદો અને વિવાદાસ્પદ પ્રદર્શનને કારણે ચર્ચામાં રહેલા ભારતના મુખ્ય કોચ ગૌતમ ગંભીર, પાકિસ્તાનના આકિબ જાવેદ, ઇમામ-ઉલ-હક તેમજ ઇંગ્લેન્ડના હેરી બ્રુક અને રોબ કીને સામેલ કરીને આઈસલેન્ડ ક્રિકેટે એક કાલ્પનિક "નાઇટમેર્સ મેનેજમેન્ટ સ્ટાફ" (ખરાબ સપના જેવી મેનેજમેન્ટ ટીમ) ની જાહેરાત કરી છે.

આઈસલેન્ડ ક્રિકેટે પોતાની વાયરલ પોસ્ટમાં ગૌતમ ગંભીરને 'મુખ્ય કોચ', પાકિસ્તાનના આકિબ જાવેદને 'ચીફ સિલેક્ટર', ઈંગ્લેન્ડના હેરી બ્રુકને 'કેપ્ટન અને પોસ્ટ-મેચ પાર્ટી ઓર્ગેનાઈઝર', રોબ કીને 'ડિરેક્ટર ઓફ ગોલ્ફ' અને ઈજાગ્રસ્ત બેટ્સમેન ઇમામ-ઉલ-હકને 'ટીમ ફિઝિયો' તરીકે દર્શાવીને ટ્રોલ કર્યા છે.

ચર્ચિત વિવાદો પર કર્યો આકરો કટાક્ષ

આ કાલ્પનિક ટીમ પાછળ તાજેતરના ક્રિકેટ વિવાદો મુખ્ય કારણ છે. ભારતીય ટીમના કોચ ગૌતમ ગંભીર તાજેતરમાં શ્રેણીમાં ટીમના નબળા પ્રદર્શન અને ટીમ સિલેક્શનને લઈને દબાણ હેઠળ છે. જ્યારે ઈંગ્લેન્ડના સ્ટાર બેટ્સમેન હેરી બ્રુક ન્યુઝીલેન્ડમાં નાઈટક્લબના બાઉન્સર સાથેના ઝઘડા અને દારૂ પીવાની સંસ્કૃતિના વિવાદને કારણે ટીકાઓનો સામનો કરી રહ્યા છે, જેથી તેને આઈસલેન્ડે "પાર્ટી ઓર્ગેનાઈઝર" કહ્યા છે.

બીજી તરફ, પાકિસ્તાનના ઓપનર ઇમામ-ઉલ-હક લોર્ડ્સ ટેસ્ટ દરમિયાન ઈજાનું બહાનું બનાવી બેટિંગ ન કરવાના આરોપો અને વેરિફિકેશન તપાસનો સામનો કરી રહ્યા હોવાથી તેમને રમૂજમાં "ફિઝિયો" નો રોલ આપવામાં આવ્યો છે. આઈસલેન્ડ ક્રિકેટની આ જીભ-ઇન-ચીક (Tongue-in-cheek) શૈલીની પોસ્ટે ક્રિકેટ ફેન્સમાં ભારે મનોરંજન પૂરું પાડ્યું છે અને સોશિયલ મીડિયા પર વાયરલ થઈ રહી છે.