સિએટલ : ફિફા વર્લ્ડ કપ ૨૦૨૬માં ઇજિપ્ત સામેની રોમાંચક મેચ ૧-૧થી ડ્રો રહ્યા બાદ ફૂટબોલના મેદાન પર જોવા મળેલા દ્રશ્યો કરતા વધુ ચર્ચા ડ્રેસિંગ રૂમની એક હસ્તલિખિત નોંધની થઈ રહી છે. ઇરાનની ટીમે સિએટલમાં પોતાનું ગ્રુપ G અભિયાન પૂર્ણ કર્યું, પરંતુ મેદાનની બહાર તેમણે જે મૂલ્યો રજૂ કર્યા છે, તેણે લાખો ફૂટબોલ પ્રેમીઓનું દિલ જીતી લીધું છે. આ નોંધમાં જીત કે હાર કરતા પણ 'ચારિત્ર્ય' અને 'સન્માન'ને વધુ મહત્વ આપવામાં આવ્યું છે, જે હવે સમગ્ર સોશિયલ મીડિયા પર વાયરલ થઈ રહ્યું છે.

"અમે એવી ભૂમિથી છીએ જ્યાં સન્માન વિજયથી ઉપર છે"

ટીમના ખેલાડીઓએ ડ્રેસિંગ રૂમમાં છોડેલી આ ભાવનાત્મક નોંધમાં લખ્યું છે કે, "અમે ઇરાનથી આવીએ છીએ, એક એવી ભૂમિ જેણે હજારો વર્ષોથી વિજય કરતાં સન્માનને ઉપર રાખ્યું છે. અમારા માટે ફૂટબોલ માત્ર સ્કોરબોર્ડ પરના આંકડા નથી, પરંતુ ચારિત્ર્યની કસોટી છે." ખેલાડીઓએ સ્પષ્ટ કર્યું કે પોઈન્ટ્સ તો ગમે તે રીતે જીતી શકાય છે, પરંતુ આદર અને ગરિમા માત્ર નિષ્પક્ષ રમત (Fair Play) દ્વારા જ પ્રાપ્ત કરી શકાય છે. નોંધમાં ઉમેર્યું છે કે, "ફેર પ્લે એ ફૂટબોલના નિયમોની માત્ર એક રેખા નથી, તે આ રમતનો આત્મા છે."

સિએટલના આતિથ્ય અને પ્રશંસકોનો આભાર

આ સંદેશ માત્ર રમતગમતના મૂલ્યો સુધી સીમિત નથી રહ્યો. ઇરાની ટીમે સિએટલ શહેરના લોકો દ્વારા આપવામાં આવેલા ઉષ્માભર્યા આતિથ્ય બદલ તેમનો આભાર માન્યો હતો. સાથે જ, આખી ટુર્નામેન્ટ દરમિયાન ટીમને પ્રોત્સાહિત કરનાર અને પોતાનું હૃદય અને અવાજ સમર્પિત કરનાર ઇરાની સમર્થકો પ્રત્યે પણ તેમણે અત્યંત આદર વ્યક્ત કર્યો હતો. સંદેશના અંતે તેમણે ગર્વ સાથે લખ્યું, "ઇરાન, હંમેશા ઉંચા ઉભા રહો!"

ઇતિહાસમાં સુવર્ણ અક્ષરે લખાશે આ ક્ષણ

ફૂટબોલ જેવા હરીફાઈથી ભરેલા ક્ષેત્રમાં, જ્યાં માત્ર જીતને જ પ્રાધાન્ય આપવામાં આવે છે, ત્યાં ઇરાની ટીમના આ અભિગમે રમતગમતની દુનિયામાં એક નવો આદર્શ સ્થાપિત કર્યો છે. નિષ્પક્ષ રમત અને નૈતિક મૂલ્યોને પ્રાથમિકતા આપીને તેમણે સાબિત કરી દીધું કે ઇતિહાસમાં નામ અમર કરવા માટે મેચ જીતવી જ જરૂરી નથી, પરંતુ જીત્યા પછી કે હાર્યા પછીનું વર્તન પણ એટલું જ પ્રભાવશાળી હોય છે. આ ઘટના બાદ સોશિયલ મીડિયા પર ઇરાની ટીમ માટે પ્રશંસાના પુષ્પ વર્ષી રહ્યા છે.