આઈચી-નાગોયા, : એશિયન ગેમ્સ ૨૦૨૬માં ભારતીય એથ્લેટિક્સ ક્ષેત્રે વધુ એક સુવર્ણ પ્રકરણ ઉમેરાયું છે. સોમવારે યોજાયેલી પુરુષોની જેવલિન થ્રો (ભાલા ફેંક) ફાઇનલમાં ભારતે 'ડબલ પોડિયમ' ફિનિશ કરીને ઈતિહાસ રચી દીધો છે. ભારતના આશાસ્પદ એથ્લેટ યશવીર સિંહે ૮૫.૭૨ મીટરના વ્યક્તિગત સર્વશ્રેષ્ઠ થ્રો સાથે સિલ્વર મેડલ પોતાના નામે કર્યો હતો, જ્યારે રોહિત યાદવે ૮૪.૩૫ મીટરના થ્રો સાથે બ્રોન્ઝ મેડલ જીતીને ભારતની ઝોળીમાં એકસાથે બે મેડલ લાવી દીધા હતા.

આ અત્યંત રસાકસીભરી અને હાઈ-વોલ્ટેજ સ્પર્ધામાં શ્રીલંકાના રૂમેશ થરંગા પથિરાગે ૮૮.૫૫ મીટરના થ્રો સાથે ગોલ્ડ મેડલ પર નિશાનો સાધ્યો હતો. જોકે, ભારતીય જોડીના આ પ્રદર્શને વિશ્વભરના રમતના ચાહકોનું ધ્યાન ખેંચ્યું છે. યશવીરે આ અગાઉ કોમનવેલ્થ ગેમ્સ ૨૦૨૬માં ૮૫.૪૧ મીટરના થ્રો સાથે બ્રોન્ઝ મેડલ જીત્યો હતો, પરંતુ જાપાનમાં તેણે પોતાના પ્રદર્શનમાં વધુ સુધારો કરીને ૮૫.૭૨ મીટર સાથે નવો પર્સનલ બેસ્ટ રેકોર્ડ પણ બનાવ્યો છે.

ભારતીય સ્ટાર જેવલિન થ્રોઅર અને ઓલિમ્પિક ગોલ્ડ મેડાલિસ્ટ નીરજ ચોપરા ઘૂંટીના લિગામેન્ટની ઈજાના કારણે ૨૦૨૬ની સીઝનમાંથી બહાર થઈ ગયા હતા. તેમની ગેરહાજરીમાં ભારતની તમામ આશાઓનો ભાર યશવીર અને રોહિતના ખભા પર હતો, જેને બંને એથ્લેટ્સે પૂર્ણ નિષ્ઠા સાથે સાકાર કરી બતાવ્યો છે. આ જીત સાથે ભારતે એશિયન ગેમ્સની છેલ્લી ત્રણ આવૃત્તિઓમાં પુરુષોની જેવલિન સ્પર્ધાના કુલ ૯ મેડલમાંથી ૫ મેડલ જીતવાનો અસાધારણ વિક્રમ જાળવી રાખ્યો છે.