રાજકોટ: આજે ૨૪ એપ્રિલ, ૨૦૨૬ના રોજ સમગ્ર વિશ્વના ક્રિકેટ ચાહકો એક ખાસ ઉત્સવ મનાવી રહ્યા છે. ભારતના રત્ન અને ક્રિકેટ જગતના મહાનતમ બેટ્સમેન સચિન રમેશ તેંડુલકર આજે તેમનો ૫૩મો જન્મદિવસ ઉજવી રહ્યા છે. ૧૬ વર્ષની નાની ઉંમરે પાકિસ્તાનના દિગ્ગજ બોલરો સામે લોહીલુહાણ નાકે ‘મૈં ખેલેગા’ કહીને શરૂ થયેલી તેમની સફર આજે ક્રિકેટના બ્રહ્માંડમાં સૌથી ઊંચા શિખરે બિરાજમાન છે. ચાલો નજર કરીએ સચિનના એવા ૧૦ રેકોર્ડ્સ પર જે તોડવા કોઈપણ ખેલાડી માટે લોઢાના ચણા ચાવવા સમાન છે.
૧. વનડે ક્રિકેટનો સૌથી લાંબો પ્રવાસ
સચિન તેંડુલકરના નામે સૌથી લાંબી ODI કારકિર્દીનો રેકોર્ડ છે. તેમણે ૨૨ વર્ષ અને ૯૧ દિવસ સુધી વનડે ક્રિકેટ રમીને નિવૃત્તિ લીધી. આ દરમિયાન તેમણે ૪૬૩ મેચ રમી, જે પોતે જ એક વિશાળ રેકોર્ડ છે.
૨. વનડેમાં રનનો પહાડ
માસ્ટર બ્લાસ્ટરે વનડેમાં ૧૮,૪૨૬ રન બનાવ્યા છે. વિરાટ કોહલી (૧૪,૭૯૭) તેમની પાછળ છે, પરંતુ બદલાતા ક્રિકેટ ફોર્મેટ અને ઓછી રમાતી વનડે મેચો જોતા આ રેકોર્ડ અતૂટ લાગે છે.
૩. આંતરરાષ્ટ્રીય મેચોની સદી
સચિને કુલ ૬૬૪ આંતરરાષ્ટ્રીય મેચ રમી છે. શ્રીલંકાના જયવર્ધને (૬૫૨) તેમની નજીક પહોંચ્યા હતા પણ રેકોર્ડ તોડી શક્યા નહીં.
૪. ટેસ્ટ ક્રિકેટમાં સદીઓનું અર્ધશતક
ટેસ્ટ ક્રિકેટના ઈતિહાસમાં ૫૧ સદી ફટકારનાર સચિન એકમાત્ર ખેલાડી છે. સક્રિય ખેલાડીઓમાં જો રૂટ (૪૧ સદી) તેમની પાછળ છે, પરંતુ ૫૧ સુધી પહોંચવું ખૂબ મુશ્કેલ છે.
૫. મેન ઓફ ધ મેચનો શહેનશાહ
સચિને વનડેમાં કુલ ૬૨ વખત 'પ્લેયર ઓફ ધ મેચ' એવોર્ડ જીત્યો છે. આજે પણ કોઈપણ સક્રિય ખેલાડી આ આંકડાની આસપાસ પણ નથી. વિરાટ કોહલી ૪૫ એવોર્ડ સાથે બીજા ક્રમે છે.
૬. ઓલરાઉન્ડર પ્રદર્શનનો જાદુ
સચિન માત્ર બેટિંગ જ નહીં, બોલિંગમાં પણ માહેર હતા. તેઓ વનડેમાં ૧૫,૦૦૦ રન અને ૧૫૦થી વધુ વિકેટ લેનારા વિશ્વના એકમાત્ર ક્રિકેટર છે. તેમણે પોતાની બોલિંગથી ભારતને ઘણી હારેલી મેચો જીતાડી છે.
૭. વર્લ્ડ કપના બાદશાહ
વર્લ્ડ કપના ઈતિહાસમાં ૨,૦૦૦થી વધુ રન બનાવનાર સચિન એકમાત્ર બેટ્સમેન છે. તેમણે ૬ વર્લ્ડ કપમાં ૨,૨૭૮ રન બનાવ્યા છે. ૨૦૦૩ના વર્લ્ડ કપમાં તેમના ૬૭૩ રનનો રેકોર્ડ આજે પણ અકબંધ છે.
૮. ૨૪ વર્ષની અવિરત સફર
૧૯૮૯માં એન્ટ્રી કરનાર સચિને ૨૪ વર્ષ અને ૧ દિવસ સુધી આંતરરાષ્ટ્રીય ક્રિકેટ રમી. ૧૦૦થી વધુ મેચ રમનારા ખેલાડીઓમાં આ સૌથી લાંબી કારકિર્દી છે.
૯. ૨૦૦ ટેસ્ટ મેચનો માઈલસ્ટોન
સૌથી વધુ ૨૦૦ ટેસ્ટ મેચ રમવાનો રેકોર્ડ સચિનના નામે છે. જેમ્સ એન્ડરસન ૧૮૮ મેચ રમીને નિવૃત્ત થયા, જેનાથી આ રેકોર્ડ હવે દાયકાઓ સુધી સુરક્ષિત જણાય છે.
૧૦. કુલ ૩૪,૩૫૭ રન: ઇતિહાસના સૌથી સફળ બેટ્સમેન
તમામ ફોર્મેટ મળીને સચિને ૩૪,૩૫૭ રન બનાવ્યા છે. ક્રિકેટની દુનિયામાં આ આંકડો એક સ્વપ્ન સમાન છે. વિરાટ કોહલી (૨૮,૨૧૫) તેમની પાછળ છે, પરંતુ સચિનના આ શિખર સુધી પહોંચવા માટે હજુ ઘણું અંતર કાપવાનું બાકી છે.
સચિન તેંડુલકર માત્ર એક ખેલાડી નથી, પણ કરોડો ભારતીયોની લાગણી અને એક યુગનું નામ છે. જન્મદિવસ મુબારક સચિન!