નવી દિલ્‍હી,તા.૦૨: એશિયન ગેમ્‍સના મેદાનમાં ભારતીય મહિલા તીરંદાજોએ એવો સુવર્ણ ઇતિહાસ રચ્‍યો છે, જેની ૭૫ વર્ષથી રાહ જોવાતી હતી. મહિલા રિકર્વ ટીમ સ્‍પર્ધામાં ભારતે પ્રથમ વખત સુવર્ણચંદ્રક જીતીને દેશના રમતગમતના ઇતિહાસમાં નવું સોનેરી પ્રકરણ ઉમેર્યું છે. ફાઇનલમાં તીરંદાજીની શક્‍તિશાળી ટીમ દક્ષિણ કોરિયાને ૫-૩થી પરાજય આપી ભારતીય દીકરીઓએ પોતાની પ્રતિભાનો પરચો આપ્‍યો હતો.

ભારત તરફથી અંકિતા ભકત, કીર્તિ શર્મા અને કુમકુમ મોહોડની ત્રિપુટીએ સમગ્ર સ્‍પર્ધા દરમિયાન શાનદાર પ્રદર્શન કર્યું હતું. ફાઇનલમાં દક્ષિણ કોરિયા સામે મુકાબલો અત્‍યંત રોમાંચક રહ્યો હતો. બંને ટીમો વચ્‍ચે દરેક તીર સાથે જીતની ખેંચતાણ જોવા મળી હતી, પરંતુ ભારતીય ખેલાડીઓએ દબાણની ક્ષણોમાં પણ નિશાન ચૂકવા દીધાં નહોતાં.

પ્રથમ સેટમાં બંને ટીમ ૫૪-૫૪ના સ્‍કોર સાથે બરાબરી પર રહી હતી. ત્‍યારબાદ મુકાબલો વધુ રસાકસીભર્યો બન્‍યો હતો. ત્રીજા સેટમાં ભારતે ૫૫-૫૧થી સેટ જીતીને ૪-૨ની સરસાઈ મેળવી હતી. અંતિમ તબક્કામાં દક્ષિણ કોરિયાએ વાપસીનો પ્રયાસ કર્યો, પરંતુ ભારતીય તીરંદાજોએ સંયમ અને આત્‍મવિશ્વાસ જાળવી રાખ્‍યો હતો. નિર્ણાયક ક્ષણે કુમકુમ મોહોડના અચૂક ૧૦ના નિશાન સાથે ભારતની ઐતિહાસિક જીત પર મહોર લાગી હતી.

આ જીતનું મહત્ત્વ એટલા માટે પણ વિશેષ છે કે દક્ષિણ કોરિયા વિશ્વ તીરંદાજીમાં લાંબા સમયથી પ્રભુત્‍વ ધરાવે છે. તેની સામે ભારતીય મહિલા ટીમે ફાઇનલમાં જીત મેળવીને પોતાની ક્ષમતા સાબિત કરી છે. અગાઉ ભારતે ૨૦૧૦ અને ૨૦૨૨ની એશિયન ગેમ્‍સમાં મહિલા રિકર્વ ટીમ સ્‍પર્ધામાં કાંસ્‍યચંદ્રક મેળવ્‍યો હતો, પરંતુ આ વખતે સીધું સુવર્ણપદક જીતીને ભારતીય દીકરીઓએ નવો ઇતિહાસ રચ્‍યો છે.

અચૂક નિશાન, અડગ આત્‍મવિશ્વાસ અને ટીમભાવનાના જોરે મળેલી આ જીત માત્ર એક ચંદ્રક નથી, પરંતુ ભારતીય મહિલા રમતવીરોની વધતી શક્‍તિ અને આંતરરાષ્ટ્રીય મંચ પરની સિદ્ધિનું ગૌરવપૂર્ણ પ્રતીક છે.