નવી દિલ્હી: પાકિસ્તાન ક્રિકેટ બોર્ડ (PCB) એ બાંગ્લાદેશ સામેની આગામી ટેસ્ટ શ્રેણી માટે 16 સભ્યોની ટીમની જાહેરાત કરી છે. ભૂતપૂર્વ કેપ્ટન સરફરાઝ અહેમદને મુખ્ય કોચ તરીકે નિયુક્ત કરવામાં આવ્યા છે. PCB એ બાંગ્લાદેશ ટેસ્ટ શ્રેણી માટે ખેલાડીઓ સાથે નવી કોચિંગ ટીમની પણ જાહેરાત કરી છે. મુખ્ય કોચ તરીકે સરફરાઝ અહેમદ ઉપરાંત, અસદ શફીકને બેટિંગ કોચ અને ઉમર ગુલને બોલિંગ કોચ તરીકે નિયુક્ત કરવામાં આવ્યા છે. શાન મસૂદે તેમનું કેપ્ટન પદ જાળવી રાખ્યું છે અને વર્તમાન ICC વર્લ્ડ ટેસ્ટ ચેમ્પિયનશિપ ચક્રમાં નવી ટીમનું નેતૃત્વ કરશે. અબ્દુલ્લા ફઝલ, અમાદ બટ, અઝાન અવૈસ અને ગાઝી ઘોરીને પ્રથમ વખત ટેસ્ટ ટીમમાં સામેલ કરવામાં આવ્યા છે. ફઝલ અને અવૈસ, બંને ડાબા હાથના બેટ્સમેન, સ્થાનિક ક્રિકેટમાં સતત પ્રદર્શન દ્વારા રાષ્ટ્રીય ટીમમાં પોતાનું સ્થાન મેળવ્યું છે. વિકેટકીપર-બેટ્સમેન ગાઝી ઘોરીએ તાજેતરમાં બાંગ્લાદેશ સામે ODI ડેબ્યૂ કર્યું હતું.ટીમમાં બાબર આઝમ, મોહમ્મદ રિઝવાન, શાહીન આફ્રિદી, નોમાન અલી, સાજિદ ખાન અને સલમાન અલી આગા જેવા અનુભવી ખેલાડીઓનો મજબૂત સમૂહ શામેલ છે.પ્રવાસ પહેલા, ચાલુ પાકિસ્તાન સુપર લીગમાં ભાગ ન લેતા ખેલાડીઓ 27 એપ્રિલથી 1 મે દરમિયાન કરાચીમાં રેડ-બોલ તાલીમ શિબિરમાં તૈયારી માટે ભેગા થશે.બે ટેસ્ટ શ્રેણીની પહેલી મેચ 8 થી 12 મે દરમિયાન શેર-એ-બાંગ્લા નેશનલ ક્રિકેટ સ્ટેડિયમ ખાતે અને બીજી મેચ 16 થી 20 મે દરમિયાન સિલહટ ઇન્ટરનેશનલ ક્રિકેટ સ્ટેડિયમ ખાતે રમાશે.પાકિસ્તાન 50 ટકા પોઈન્ટ સાથે વર્લ્ડ ટેસ્ટ ચેમ્પિયનશિપ ટેબલમાં પાંચમા ક્રમે છે. તેઓ આઠમા ક્રમે રહેલા બાંગ્લાદેશ સામે પોતાનું સ્થાન સુધારવાનું લક્ષ્ય રાખે છે.
બાંગ્લાદેશ ટેસ્ટ શ્રેણી માટે પાકિસ્તાનની ટીમઃ શાન મસૂદ (કેપ્ટન), અબ્દુલ્લા ફઝલ, અમાદ બટ્ટ, અઝાન ઔવેસ, બાબર આઝમ, હસન અલી, ઇમામ-ઉલ-હક, ખુર્રમ શહઝાદ, મોહમ્મદ અબ્બાસ, મોહમ્મદ રિઝવાન, ગાઝી ઘોરી, નોમાન અલી, સાજિદ ખાન, સલમાન અલી આગા, સઉદ શકીલ, શાહીન શાહ અફરી.