(જયપુર): ઇન્ડિયન પ્રીમિયર લીગ (IPL) માં હંમેશા રોમાંચક મેચો જોવા મળે છે, પરંતુ રાજસ્થાન રોયલ્સ અને ગુજરાત ટાઇટન્સ વચ્ચેની તાજેતરની મેચમાં મેદાન કરતા વધારે ચર્ચા 'ટોસ'ની થઈ રહી છે. IPL ના ઇતિહાસમાં કદાચ પહેલીવાર એક એવી અજીબોગરીબ ઘટના બની, જેને કારણે મેચ રેફરી અને કેપ્ટન શુભમન ગિલ વચ્ચે ઘર્ષણ સર્જાયું અને નેટીઝન્સે તેને 'ટોસ ફિક્સિંગ'નું નામ આપી દીધું છે.
શું હતી સમગ્ર ઘટના?
મેચ શરૂ થાય તે પહેલા જ્યારે બંને ટીમના કેપ્ટન ટોસ માટે મેદાન પર ઉતર્યા, ત્યારે મેચ રેફરી પ્રકાશ ભટ્ટ રિયાગ પરાગનો કોલ સ્પષ્ટ રીતે સાંભળી શક્યા ન હતા. પરિણામે, એક મૂંઝવણભરી સ્થિતિ સર્જાઈ. શુભમન ગિલને લાગ્યું કે તેણે ટોસ જીતી લીધો છે અને તે પોતાની રણનીતિ સાથે આગળ વધવાની તૈયારીમાં જ હતો, ત્યાં જ અચાનક મેચ રેફરીએ હસ્તક્ષેપ કર્યો અને ફરીથી ટોસ કરવાનો આદેશ આપ્યો. આ અચાનક બદલાવથી ગુજરાત ટાઇટન્સના કેપ્ટન શુભમન ગિલ સ્પષ્ટપણે નારાજ અને ગુસ્સામાં જોવા મળ્યા હતા.
શુભમન ગિલની સ્પષ્ટ વાત: 'મેં પહેલી વાર પણ જીત્યો હતો'
આ ઘટના બાદ જ્યારે ગિલને બોલવાની તક મળી, ત્યારે તેણે પોતાની નારાજગી છુપાવી નહીં. તેણે મેચના પ્રેઝન્ટેશન દરમિયાન જાહેરમાં કહ્યું, "મેં પહેલા જ ટોસ જીતી લીધો હતો." ગિલની આ વાત સાબિત કરે છે કે તે રેફરીના આ નિર્ણયથી બિલકુલ સંતુષ્ટ નહોતો. આખરે રાજસ્થાન રોયલ્સે ટોસ જીત્યો અને તેમણે પ્રથમ બેટિંગ કરવાનો નિર્ણય લીધો, પરંતુ આ ઘટના મેચની શરૂઆત પહેલા જ ચર્ચાનું કેન્દ્ર બની ગઈ હતી.
સોશિયલ મીડિયા પર 'ફિક્સિંગ'ના આરોપ
જેવો આ વીડિયો સોશિયલ મીડિયા પર વાયરલ થયો, નેટીઝન્સે આ ઘટનાને 'ટોસ ફિક્સિંગ' ગણાવીને આકરા પ્રહારો શરૂ કરી દીધા છે. એક યુઝરે લખ્યું, "આ તો સરેઆમ છેતરપિંડી છે, ગુજરાત ટાઇટન્સ પહેલેથી જ ટોસ જીતી ચૂક્યું હતું પણ ફરીથી સ્પિન કરાવીને પરિણામ બદલી દેવાયું." બીજા એક યુઝરે આ ઘટનાને 'ડેલાઇટ લૂંટ' (દિવસે દહાડે લૂંટ) ગણાવી છે. ચાહકો હવે આ મામલે તપાસની માંગ કરી રહ્યા છે અને સોશિયલ મીડિયા પર આ વીડિયોને લઈને વિવિધ મીમ્સ અને તર્ક-વિતર્કોનો રાફડો ફાટ્યો છે.
આ ઘટનાએ માત્ર ક્રિકેટ પ્રેમીઓને જ નહીં, પણ રમતની પારદર્શિતા પર પણ સવાલો ઉભા કર્યા છે. શું ખરેખર તે માત્ર એક ભૂલ હતી કે પછી બીજું કંઈ? તે તો સમય જ કહેશે, પણ આ અજીબ ઘટનાએ IPL સીઝન ૨૦૨૬માં વિવાદનું એક નવું પ્રકરણ ઉમેરી દીધું છે.