તા. ૧૨ નવેમ્બર ર૦ર૬ વિક્રમ સંવત ર૦૮૩ કારતક સુદ – ૩ ગુરૂવાર
આર્જેન્ટીના અને સ્પેન વચ્ચે ફાઇનલ મુકાબલો
લિઓનલ મેસીની આર્જેન્ટીનાની ટીમ સતત બીજી વખત ટ્રોફી જીતવા અને સ્પેનની યુવા બ્રિગેડ ઇતિહાસ રચવા મેદાને ઉતરશે : ભારતીય સમય અનુસાર ર૦મીના મોડી રાત્રે ૧રઃ૩૦થી જંગ શરૂ થશે : ઇતિહાસમાં પ્રથમ વખત હાફ ટાઇમ શોમાં જબરદસ્ત મ્યુઝીકલ શોમાં મડોના, જસ્ટિન બીબર, શાકીરા જેવા કલાકારો પર્ફોમ કરશે : વિજેતા ટીમને ડોનાલ્ડ ટ્રમ્પ ટ્રોફી આપશે
નવી દિલ્હી : સમગ્ર વિશ્વના અબજો રમતપ્રેમીઓ જે પળની છેલ્લા ચાર વર્ષથી આતુરતાપૂર્વક રાહ જોઈ રહ્યા હતા, તે ગૂઝબમ્પ્સ અપાવનારી ઐતિહાસિક ઘડી હવે આંગણે આવીને ઊભી રહી છે. રમતજગતની સૌથી મોટી સત્તાવાર ટૂર્નામેન્ટ એટલે કે ફિફા વર્લ્ડકપ ૨૦૨૬નો ફાઇનલ મુકાબલો આગામી ૧૯ જુલાઈ, ૨૦૨૬ (રવિવાર)ના રોજ અમેરિકાના ન્યૂ જર્સી સ્થિત આલીશાન મેટલાઇફ સ્ટેડિયમ ખાતે રમાવા જઈ રહ્યો છે. ભારતીય સમય અનુસાર આ મહામુકાબલો ૨૦ જુલાઈના રોજ મોડી રાત્રે ૧૨:૩૦ વાગ્યે શરૂ થશે, જેને લાઈવ જોવા માટે આખી દુનિયા ટીવી, મોબાઈલ અને ઓનલાઈન સ્ક્રીન સામે ગોઠવાઈ જશે. આ વખતની ફાઇનલ માત્ર એક મેચ નથી, પરંતુ ફૂટબોલ ઇતિહાસના બે સુવર્ણ યુગ અને બે વિભિન્ન શૈલીની ટક્કર છે જે સદીઓ સુધી યાદ રાખવામાં આવશે.
મેદાન પર ઉતરનારી બંને ટીમોની સફર અત્યંત રોમાંચક અને દિલધડક રહી છે. એકતરફ ડિફેન્ડિંગ ચેમ્પિયન આર્જેન્ટિના છે, જેણે સેમિફાઇનલમાં કટ્ટર હરીફ ઇંગ્લેન્ડને ૨-૧થી ધૂળ ચટાડીને સતત બીજી વાર ફાઇનલની ટિકિટ બુક કરાવી પોતાની નબળી શરૂઆતની ટીકાઓનો જડબાતોડ જવાબ આપ્યો છે. બીજી તરફ હાલમાં સૌથી વિસ્ફોટક ફોર્મમાં ચાલી રહેલી યુરોપિયન કિંગ સ્પેનની ટીમ છે, જેણે સેમિફાઇનલમાં ફેવરિટ ગણાતી મજબૂત ફ્રાન્સની ડિફેન્સ લાઇનને ૨-૦થી કચડીને ફાઇનલમાં ધમાકેદાર અને અજેય એન્ટ્રી કરી છે. લિઓનલ મેસ્સી પોતાની આંતરરાષ્ટ્રીય કરિયરની આ છેલ્લી અને સૌથી મોટી ટૂર્નામેન્ટને સુવર્ણ અક્ષરોથી યાદગાર બનાવી ફરી એકવાર ટ્રોફી સાથે આખી દુનિયા સમક્ષ વિદાય લેવા માંગશે, જ્યારે સ્પેનની યુવા સનસનાટીભરી આક્રમક બ્રિગેડ આર્જેન્ટિનાના વિજયી રથને રોકીને વિશ્વ ફૂટબોલ સામ્રાજ્ય પર નવો સૂર્યોદય કરવા માટે લોહી-પાણી એક કરશે.
આ ફાઇનલ મુકાબલો માત્ર મેદાન પરની ૯૦ મિનિટની રમત પૂરતો સીમિત નથી, પરંતુ રમતગમતના ઇતિહાસમાં મનોરંજનની દુનિયાનો એક નવો કીર્તિમાન સ્થાપિત કરવા જઈ રહ્યો છે. ફિફાના ઇતિહાસમાં પહેલીવાર અમેરિકાના પ્રખ્યાત ‘સુપર બાઉલ'ની ભવ્ય તર્જ પર આ ફાઇનલ મેચમાં સત્તાવાર રીતે લાઈવ ‘હાફ-ટાઇમ શો'નું આયોજન કરવામાં આવ્યું છે. ફર્સ્ટ હાફ પૂરો થયા બાદ મેચના વિરામ સમય દરમિયાન સ્ટેડિયમમાં લાઇટ્સ, લેઝર અને મ્યુઝિકનો એવો આકાશી જાદુ ચાલશે, જેમાં વૈશ્વિક મ્યુઝિકલ સુપરસ્ટાર મડોના, પૉપ આઇકોન જસ્ટિન બીબર, લેટિન સેન્સેશન ક્વીન શાકીરા અને કોરિયન હાર્ટથ્રોબ બેન્ડ BTSના કલાકારો પોતાના ધમાકેદાર અને અદભુત પર્ફોર્મન્સથી કરોડો ચાહકોના દિલ જીતી લેશે. સ્ટેડિયમની અંદર ઉપસ્થિત ૮૫,૦૦૦થી વધુ પ્રેક્ષકો અને ટેલિવિઝન પર જોનારા અબજો લોકો માટે આ શો જીવનભરનું સંભારણું બની રહેશે.
આ રોમાંચક અને દિલધડક મેચની પૂર્ણાહુતિ બાદ, વિજેતા બનનારી ટીમને કરોડો ચાહકોની હાજરીમાં, અબજો રૂપિયાની કિંમત ધરાવતી અને અતિ પ્રતિષ્ઠિત એવી અસલી સોનાની ચમકતી ફિફા વર્લ્ડકપ ટ્રોફી અમેરિકાના રાષ્ટ્રપતિ ડોનાલ્ડ ટ્રમ્પના હસ્તે એનાયત કરવામાં આવશે. સમગ્ર પળથ્વી પરના ખેલ જગતમાં અત્યારે માત્ર એક જ સૌથી મોટો સવાલ ગુંજી રહ્યો છે કે શું આર્જેન્ટિના પોતાની સલ્તનત અને બાદશાહત જાળવી રાખવામાં સફળ રહેશે કે પછી સ્પેન ફૂટબોલ સામ્રાજ્યનો નવો રાજા બનીને ઉભરશે. આ સવાલનો જવાબ મેળવવા માટે આખી દુનિયા શ્વાસ રોકીને ૧૯ જુલાઈની રાતની રાહ જોઈ રહી છે.
(2:33 PM IST)
છેલ્લા 8 દિવસમાં સૌથી લોકપ્રિય 
