લંડન : ઇંગ્લેન્ડના ટેસ્ટ કેપ્ટન બેન સ્ટોક્સનો તાજેતરમાં વાયરલ થયેલો એક ફોટો સોશિયલ મીડિયા પર ચર્ચાનું કેન્દ્ર બન્યો છે, જેમાં આ દિગ્ગજ ખેલાડીને ઓળખવો લગભગ અશક્ય બની ગયો છે. આ વર્ષની શરૂઆતમાં પ્રેક્ટિસ દરમિયાન હેલ્મેટ ન પહેરવાની નાનકડી ભૂલ સ્ટોક્સને ભારે પડી હતી, જ્યારે એક તેજ ગતિએ આવતો બોલ સીધો તેની આંખની નીચે ગાલના હાડકા પર વાગ્યો હતો. આ ગંભીર ઇજા બાદ તેને તાત્કાલિક જટિલ સર્જરી કરાવવી પડી હતી. સર્જરીના થોડા જ મહિનાઓ બાદ સામે આવેલા તેના ફોટામાં ચહેરો અત્યંત સુકાઈ ગયેલો અને અશક્ત લાગી રહ્યો છે, જે જોઈને ચાહકોમાં આશ્ચર્ય સાથે ચિંતા ફેલાઈ છે.

બેન સ્ટોક્સે પોતે સ્વીકાર્યું હતું કે તે સમયે તે અત્યંત નસીબદાર રહ્યો હતો કે તેની આંખ બચી ગઈ, કારણ કે ગાલના હાડકાને ખૂબ જ ખરાબ રીતે નુકસાન થયું હતું. ૩૪ વર્ષીય ઓલરાઉન્ડરના જણાવ્યા મુજબ, આ ઇજા તેની કારકિર્દીની સૌથી ગંભીર ઘટનાઓ પૈકીની એક હતી. ઓપરેશન બાદ તેના લુકમાં જે રીતે ધરખમ ફેરફાર જોવા મળ્યો છે, તે સ્પષ્ટ કરે છે કે રિકવરીનો ગાળો તેના માટે શારીરિક રીતે ઘણો મુશ્કેલ રહ્યો છે. મેદાન પર પરત ફરવા માટે ઉત્સુક સ્ટોક્સ અત્યારે રિહેબિલિટેશન પ્રક્રિયામાંથી પસાર થઈ રહ્યો છે, પરંતુ તેના બદલાયેલા દેખાવે મેદાન પર તેની જૂની આક્રમકતા જોવા મળશે કે કેમ તે અંગે સવાલો ઉભા કર્યા છે.

ક્રિકેટ નિષ્ણાતો અને મેડિકલ ટીમ સ્ટોક્સની સ્થિતિ પર સતત નજર રાખી રહી છે, કારણ કે ચહેરાની સર્જરી બાદ મેદાન પર પરત ફરવામાં માનસિક મક્કમતા પણ જરૂરી હોય છે. આ ઘટના ફરી એકવાર ક્રિકેટમાં હેલ્મેટ અને સેફ્ટી ગિયર્સના મહત્વને અધોરેખિત કરે છે. ઇંગ્લિશ ફેન્સ અત્યારે આશા રાખી રહ્યા છે કે તેમનો મનપસંદ કેપ્ટન ટૂંક સમયમાં જ સ્વસ્થ થઈને જૂના અંદાજમાં મેદાન પર ચોગ્ગા-છગ્ગાની ઝડી વરસાવતો જોવા મળે. હાલમાં તો સ્ટોક્સનો આ નવો અને અપરિચિત અવતાર વિશ્વભરના ક્રિકેટ પ્રેમીઓમાં ચર્ચાનો ગરમ વિષય બન્યો છે.