ડરબન: ભારતીય મહિલા ક્રિકેટ ટીમ એક લાંબા વિરામ બાદ ફરીથી મેદાનમાં ઉતરવા માટે સજ્જ છે. વર્ષ 2025ના મહિલા વર્લ્ડ કપની ઐતિહાસિક ફાઈનલ બાદ ભારત અને દક્ષિણ આફ્રિકાની ટીમો પહેલીવાર સામસામે ટકરાશે. પાંચ મેચોની આ મહત્વપૂર્ણ T20I શ્રેણીની પ્રથમ મેચ આજે દક્ષિણ આફ્રિકાના ડરબન સ્થિત પ્રતિષ્ઠિત કિંગ્સમીડ સ્ટેડિયમ ખાતે રમાશે. 2026ના આગામી T20 વર્લ્ડ કપની તૈયારીઓના ભાગરૂપે આ શ્રેણી બંને ટીમો માટે ખૂબ જ મહત્વની માનવામાં આવી રહી છે.
ઐતિહાસિક પ્રતિસ્પર્ધાનો નવો અધ્યાય
ગયા વર્ષે નવેમ્બરમાં ભારતે દક્ષિણ આફ્રિકાને હરાવીને પોતાની પ્રથમ સિનિયર મહિલા ICC ટ્રોફી જીતીને ઈતિહાસ રચ્યો હતો. બીજી તરફ, સાઉથ આફ્રિકાની ટીમ પોતાના હોમ ગ્રાઉન્ડ પર એ હારનો બદલો લેવા અને ફરીથી લય મેળવવા માટે બેતાબ છે. ડરબન અને જોહાનિસબર્ગના મેદાનો પર રમાનારી આ શ્રેણી ભારતીય ટીમ માટે એક મોટો પડકાર સાબિત થશે, કારણ કે દક્ષિણ આફ્રિકાની ટીમ T20 ફોર્મેટમાં વિશ્વની સૌથી ઘાતક ટીમોમાંની એક ગણાય છે.
ટીમ ઈન્ડિયાનો વિજયી રથ
ભારતીય ટીમ હાલમાં શાનદાર ફોર્મમાં છે. તાજેતરમાં જ ભારતે શ્રીલંકાને 5-0થી ક્લીન સ્વીપ આપ્યું હતું અને ફેબ્રુઆરીમાં ઓસ્ટ્રેલિયા જેવી મજબૂત ટીમ સામે 2-1થી શ્રેણી જીતીને પોતાનું લોખંડ મનાવ્યું હતું. હરમનપ્રીત કૌરની આગેવાની હેઠળની આ ટીમમાં યુવા જોશ અને અનુભવનું સચોટ મિશ્રણ છે, જે દક્ષિણ આફ્રિકાની ધરતી પર ફરી એકવાર વિજય પતાકા લહેરાવવા માટે ઉત્સાહિત છે.
મેચની વિગતો અને લાઈવ ટેલિકાસ્ટ
ભારતીય ચાહકો આ રોમાંચક મેચનો આનંદ ઘરે બેઠા માણી શકશે. ભારત અને દક્ષિણ આફ્રિકા વચ્ચેની આ પ્રથમ T20 મેચ ભારતીય સમયાનુસાર રાત્રે 9:30 વાગ્યે શરૂ થશે.
•    સ્થળ: કિંગ્સમીડ સ્ટેડિયમ, ડરબન
•    ટીવી ચેનલ: સ્ટાર સ્પોર્ટ્સ નેટવર્ક (ભારત)
•    લાઈવ સ્ટ્રીમિંગ: JioHotstar એપ અને વેબસાઇટ પર
12 જૂનથી શરૂ થનારા મેગા-ઈવેન્ટ પહેલા ભારત માટે આ શ્રેણી એક 'રિયાલિટી ચેક' જેવી હશે. શું ભારત પોતાનો દબદબો જાળવી રાખશે કે પછી પ્રોટીઝ ટીમ ઘરઆંગણે પલટવાર કરશે? તેના પર વિશ્વભરના ક્રિકેટ પ્રેમીઓની નજર ટકેલી છે.