બેંગલુરુ : દુલીપ ટ્રોફી ૨૦૨૬ ની બીજી સેમિફાઇનલ મેચમાં સાઉથ ઝોને નોર્થ ઝોન પર ૭ વિકેટે અદ્ભુત વિજય મેળવીને ફાઇનલમાં પ્રવેશ કરી લીધો છે. કેપ્ટન તિલક વર્માના શાનદાર નેતૃત્વ અને એમડી નિધીશની ધારદાર બોલિંગના બળે દક્ષિણ ઝોને બેંગલુરુના બીસીસીઆઈ સેન્ટર ઓફ એક્સેલન્સ ગ્રાઉન્ડ ખાતે રમાયેલી મેચમાં મેદાન મારી લીધું હતું.

મેચના ચોથા અને અંતિમ દિવસે નોર્થ ઝોને તેના નાઇટ વોચમેન સ્કોર ૨૫૬/૭ માં આગળ રમતા ૨૯૭ રને ઓલઆઉટ થઈ ગયું હતું. સાઉથ ઝોન તરફથી એમડી નિધીશે બોલિંગમાં અદ્ભુત પ્રદર્શન કરતા ૫૬ રન આપીને ૫ વિકેટ ઝડપી હતી. આ રીતે દક્ષિણ ઝોનને જીતવા માટે ૧૮૧ રનનો ટાર્ગેટ મળ્યો હતો.

તિલક વર્મા અને આર. સ્મરણની અણનમ ભાગીદારીથી વિજય નિશ્ચિત

લક્ષ્યાંકનો પીછો કરવા ઉતરેલી સાઉથ ઝોનની ટીમને રિકી ભુઈ (૪૨) અને નારાયણ જગદીસન (૪૩) એ મજબૂત શરૂઆત અપાવી હતી. ત્યારબાદ કેપ્ટન તિલક વર્મા અને આર. સ્મરણે મોરચો સંભાળ્યો હતો. બંને વચ્ચે ચોથી વિકેટ માટે ૭૯ રનની અણનમ ભાગીદારી નોંધાઈ હતી. તિલક વર્માએ ધૈર્યપૂર્વક રમતા અણનમ ૫૧ રનની ઇનિંગ રમી હતી અને ચોગ્ગો ફટકારીને ટીમને જીત અપાવવાની સાથે પોતાની ફિફ્ટી પણ પૂરી કરી હતી.

આ પહેલા પ્રથમ ઇનિંગ્સમાં પણ જ્યારે સાઉથ ઝોનની ટીમ ૮૦/૫ ના સ્કોર પર મુશ્કેલીમાં હતી, ત્યારે તિલક વર્માએ ૧૧૬ રન અને શ્રેયસ ગોપાલે ૮૭ રન બનાવીને ટીમ માટે ૧૧૭ રનની મહત્વની લીડ મેળવી આપી હતી. હવે ૬ સપ્ટેમ્બરથી ચેન્નાઈના એમ. એ. ચિદમ્બરમ સ્ટેડિયમ ખાતે રમાનારી ફાઇનલમાં સાઉથ ઝોનનો સામનો ઈસ્ટ ઝોન સામે થશે.