ચેન્નાઈ : IPL 2026ની રસાકસી વચ્ચે ચેન્નાઈ સુપર કિંગ્સ (CSK) એ પોતાની ટીમમાં એક મોટો ફેરફાર કર્યો છે. મુંબઈ ઈન્ડિયન્સ સામેની મેચ દરમિયાન જમણા પગની ઈજાના કારણે બહાર ફેંકાયેલા રામકૃષ્ણ ઘોષના સ્થાને CSKએ કર્ણાટકના પ્રતિભાશાળી ઓલરાઉન્ડર મેકનીલ નોરોન્હાને ટીમમાં સામેલ કર્યો છે. ૩૦ લાખ રૂપિયાની કિંમતે કરારબદ્ધ થયેલો આ ખેલાડી બાકીની સીઝન માટે ધોનીની ટીમમાં મજબૂતી ઉમેરશે.

દુબઈમાં જન્મ અને ક્રિકેટ માટે ભારતની સફર

મેકનીલ નોરોન્હાની કહાની કોઈ ફિલ્મી પટકથા જેવી છે. તેમનો જન્મ દુબઈમાં એક મેન્ગલુરુ સ્થિત પરિવારમાં થયો હતો. દુબઈમાં રહીને જ તેમણે ક્રિકેટના પ્રારંભિક પાઠ શીખ્યા અને કિશોરાવસ્થામાં યુએઈ (UAE) ક્રિકેટમાં એક જ વર્ષમાં ૧,૭૦૦થી વધુ રન ફટકારીને સનસનાટી મચાવી દીધી હતી. જોકે, ભારતીય રાષ્ટ્રીય ટીમ માટે રમવાનું સપનું પૂરું કરવા માટે તેઓ બેંગલુરુ શિફ્ટ થયા અને કર્ણાટક ક્રિકેટ સિસ્ટમનો હિસ્સો બન્યા.

ઘરેલું ક્રિકેટમાં ધમાકેદાર પ્રદર્શન

મેકનીલ નોરોન્હાએ તાજેતરમાં ઘરેલું ક્રિકેટમાં શાનદાર પ્રદર્શન કર્યું છે. ૨૦૨૪-૨૫ની કર્નલ સીકે નાયડુ ટ્રોફીમાં તેઓ સૌથી વધુ રન બનાવનાર ખેલાડી રહ્યા હતા, જેના માટે તેમને બીસીસીઆઈ (BCCI) ના નમન એવોર્ડ્સમાં 'એમએ ચિદમ્બરમ ટ્રોફી' એનાયત કરવામાં આવી હતી. આ ઉપરાંત, મહારાજા ટ્રોફીમાં મેન્ગલુરુ ડ્રેગન્સ માટે અને સૈયદ મુશ્તાક અલી ટ્રોફીમાં કર્ણાટક માટે પણ તેમણે પોતાની ઓલરાઉન્ડ ક્ષમતા સાબિત કરી છે.

CSK માટે પ્લેઓફની આશા

CSK માટે આ સીઝન ઉતાર-ચઢાવવાળી રહી છે. અનેક ખેલાડીઓની ઈજા વચ્ચે ટીમ અત્યારે પ્લેઓફમાં ક્વોલિફાય થવા માટે ઝઝૂમી રહી છે. મેકનીલ નોરોન્હા જેવો યુવાન અને ઉત્સાહી ઓલરાઉન્ડર ટીમમાં આવવાથી બેટિંગ અને બોલિંગ બંનેમાં ઊંડાણ મળશે. ચાહકોને આશા છે કે આ નવો ખેલાડી ધોનીના માર્ગદર્શન હેઠળ ચમકશે અને ચેન્નાઈને પ્લેઓફ સુધી પહોંચાડવામાં મહત્વની ભૂમિકા ભજવશે.