નવી દિલ્હી : કોમનવેલ્થ ગેમ્સ 2026 (CWG 2026) માં ભારતીય પેરા એથ્લેટ્સે પોતાની અદભુત રમત અને અદમ્ય ઈચ્છાશક્તિના જોરે એક નવો સવર્ણિમ ઈતિહાસ રચી દીધો છે. ગ્લાસગો ખાતે રમાયેલી વિવિધ સ્પર્ધાઓમાં ૨૮ સભ્યોની ભારતીય ટુકડીએ કુલ ૭ મેડલ – જેમાં ૩ ગોલ્ડ, ૨ સિલ્વર અને ૨ બ્રોન્ઝ શામેલ છે – જીતીને અત્યાર સુધીનું સૌથી ઉત્કૃષ્ટ પ્રદર્શન કર્યું છે. આ સફળતા માત્ર આંકડા પૂરતી સીમિત નથી, પરંતુ ભારતે ગેમ્સના અગાઉના તમામ સંસ્કરણોમાં મળીને જેટલા મેડલ જીત્યા હતા, તે બધાની બરાબર એક જ આવૃત્તિમાં મેળવીને પોતાની તાકાત બતાવી દીધી છે.

આ ઐતિહાસિક સફરમાં દેશનું ગૌરવ વધારનારા શૂરાઓની વાર્તાઓ હૃદયસ્પર્શી છે. જમ્મુ-કાશ્મીરમાં એલઓસી (LoC) પર લેન્ડમાઇન બ્લાસ્ટમાં પોતાનો પગ ગુમાવનારા સેનાના જવાન સોમન રાણાએ F57 શોટ પુટ ઇવેન્ટમાં ૧૩.૪૦ મીટરના થ્રો સાથે ગોલ્ડ મેડલ પોતાના નામે કર્યો હતો. આ જ ઇવેન્ટમાં બાઇક અકસ્માતમાં પગ ગુમાવનાર પૂર્વ કેડેટ શુભમ જુયાલે ૧૩.૨૮ મીટર થ્રો કરીને સિલ્વર મેડલ જીત્યો હતો, જેનાથી ભારતે આ સ્પર્ધામાં ગોલ્ડ અને સિલ્વર બંને પર કબજો જમાવીને ઇતિહાસ રચ્યો હતો.

આ ઉપરાંત, પેરા પાવરલિફ્ટિંગમાં ભારતને પ્રથમ મેડલ અપાવનાર ૨૮ વર્ષીય ઝાંડુ કુમારની કહાની પણ પ્રેરણાદાયી છે. એક સમયે ગુજરાન ચલાવવા રિક્ષા ચલાવતા અને શાકભાજી વેચતા ઝાંડુએ નેશનલ ચેમ્પિયનશિપમાં ભાગ લેવા માટે પોતાની રિક્ષા વેચી દીધી હતી. તેમણે ૧૯૦ કિગ્રા વજન ઊંચકીને પુરુષોની હેવીવેઇટ ઇવેન્ટમાં બ્રોન્ઝ મેડલ મેળવી ભારતનું ખાતું ખોલ્યું હતું.

મહિલા વર્ગમાં હરિયાણાની શર્મિલા ધનકરે F57 શોટ પુટમાં ૯.૮૧ મીટરના થ્રો સાથે ગોલ્ડ મેડલ જીતીને ઇતિહાસ રચ્યો હતો, જ્યારે કર્ણાટકથી આવતી શિલ્પા કે. શાયલાએ બ્રોન્ઝ મેડલ મેળવ્યો હતો. ટ્રેક ઇવેન્ટ્સમાં ૧૧ વર્ષની ઉંમરે અકસ્માતમાં હાથ ગુમાવનાર આદિવાસી દોડવીર દિલીપ મહાદુ ગાવિતે ૧૦૦ મીટર રેસ ૧૦.૭૧ સેકન્ડમાં પૂરી કરીને નવો ગેમ્સ રેકોર્ડ બનાવી ગોલ્ડ જીત્યો હતો અને તેમની પાછળ મોહમ્મદ બાસિલ મોર્સિંગાનાકથે ૧૦.૮૩ સેકન્ડ સાથે સિલ્વર મેડલ હાંસલ કર્યો હતો.

આ સાત મેડલ માત્ર વિજયની ગાથા નથી, પરંતુ શારીરિક પડકારો, ગરીબી અને વિપરીત પરિસ્થિતિઓ સામે લડીને ભારતનું નામ રોશન કરનારા ખેલાડીઓની અદ્ભુત ખુદ્દારી અને સમર્પણની અમર વાર્તા છે.