નવી દિલ્હી: ​વિશ્વના મહાન ફૂટબોલરોમાં ગણાતા ક્રિસ્ટિયાનો રોનાલ્ડો અને પોર્ટુગલ ફૂટબોલ ટીમ તેમજ ટીમના કોચ જોર્જ જેસસ વચ્ચે સંબંધો વણસ્યા હોવાની અટકળો સતત તેજ બની રહી છે. ડેન્માર્ક સામેની નેશન્સ લીગ મેચ પહેલા રોનાલ્ડોએ પોર્ટુગલ કેમ્પ છોડી દીધો હતો, જે બાદ ફૂટબોલ જગતમાં ભારે ખળભળાટ મચ્યો હતો. હવે રોનાલ્ડોની એક સોશિયલ મીડિયા ગતિવિધિએ આ વિવાદમાં બળતામાં ઘી હોમવાનું કામ કર્યું છે.

​રોનાલ્ડોએ તાજેતરમાં સોશિયલ મીડિયા પર એક એવી પોસ્ટ લાઈક કરી છે, જેમાં તેની અને લિયોનેલ મેસીની તેમની પોતપોતાની રાષ્ટ્રીય ટીમો દ્વારા કરવામાં આવતી વર્તણૂકની સરખામણી કરવામાં આવી છે.

​શું હતો વાયરલ વિડીયો અને પોસ્ટ?
​વાયરલ વિડીયોમાં બ્રાઝિલના પૂર્વ ફૂટબોલર ફિલીપ મેલો (Felipe Melo) 'સ્પોર્ટ ટીવી' સાથેની વાતચીતમાં પોર્ટુગલ ટીમની ટીકા કરતા જોવા મળે છે. મેલોએ જણાવ્યું હતું કે, "આર્જેન્ટિનામાં મેસીને જે ભારે સન્માન અને પ્રેમ મળે છે, તેની સરખામણીએ રોનાલ્ડોને તેના પોતાના સાથી ખેલાડીઓ કરતાં વિરોધી ટીમ તરફથી વધુ માન મળે છે. રોનાલ્ડોના સ્તરે કોઈ પહોંચી શકે તેમ નથી. ઇતિહાસના સૌથી મહાન ખેલાડી સાથે આવું વર્તન અસ્વીકાર્ય છે."

​રોનાલ્ડોએ આ વિડીયો પોસ્ટને લાઈક કરતાં જ સોશિયલ મીડિયા પર ચાહકો અને રમત વિવેચકો વચ્ચે જોરદાર ચર્ચા શરૂ થઈ ગઈ છે.

​કેમ્પ છોડવા અંગે રોનાલ્ડોની પ્રતિક્રિયા
​અહેવાલો અનુસાર, ડેન્માર્ક સામેની મેચમાં કોચ તેને બેન્ચ પર (રિઝર્વ ખેલાડી તરીકે) બેસાડવા માંગતા હતા, જે ખબર પડતાં જ રોનાલ્ડોએ કેમ્પ છોડી દીધો હતો. ત્યારબાદ નોર્વે સામેની મેચમાં પણ તેની જરૂર પડી નહોતી. રોનાલ્ડોએ સ્પષ્ટતા કરી છે કે તેણે પોર્ટુગીઝ ફૂટબોલ ફેડરેશનના પ્રમુખ સાથે વાતચીત કર્યા બાદ જ આ નિર્ણય લીધો હતો અને યોગ્ય સમયે તે કેમ્પ છોડવાનું સાચું કારણ જાહેર કરશે.

​બ્રુનો ફર્નાન્ડીઝ રોનાલ્ડોના બચાવમાં આવ્યો
​બીજી તરફ, ટીમમાં મતભેદના અહેવાલો વચ્ચે પોર્ટુગલના સ્ટાર ખેલાડી બ્રુનો ફર્નાન્ડીઝે રોનાલ્ડોનો બચાવ કર્યો છે. તેણે ડ્રેસિંગ રૂમમાં કોઈ વિભાગીય વિવાદ હોવાનો ઈનકાર કરતાં કહ્યું, "મેં ક્રિસ્ટિયાનો સાથે વાત કરી છે. ભલે ગમે તે થાય, રોનાલ્ડો હંમેશા આપણી રાષ્ટ્રીય ટીમ, આપણા ફૂટબોલ અને દેશનું સૌથી મોટું પ્રતીક રહેશે. દરેક પોર્ટુગીઝ નાગરિકના દિલમાં તેનું સ્થાન અકબંધ છે અને આપણે બાબતોને વિભાજિત કરવાનું બંધ કરવું જોઈએ."