હરારે : ઝિમ્બાબ્વે સામેની બીજી T20I મેચમાં ભારતીય ટીમે શાનદાર વિજય મેળવીને શ્રેણી પર કબજો જમાવી લીધો હોવા છતાં, ટીમ ઇન્ડિયા માટે એક માઠાં સમાચાર સામે આવ્યા છે. મેચ દરમિયાન ભારતના અનુભવી ઝડપી બોલર પ્રિન્સ યાદવને હેમસ્ટ્રિંગની ગંભીર ઇજા થતાં તેણે મેદાન છોડવું પડ્યું હતું. આ અણધારી ઇજાના કારણે ભારત આગામી અંતિમ T20I મેચમાં એક ખેલાડી શોર્ટ રમે તેવી પરિસ્થિતિ સર્જાઈ હતી અને હવે રવિવારે રમાનારી છેલ્લી મેચમાં પ્રિન્સનું રમવું લગભગ અશક્ય લાગી રહ્યું છે.

મેચ પૂરી થયા બાદ ભારતીય ટીમના કેપ્ટન શ્રેયસ અય્યરે પ્રિન્સ યાદવની ઇજા અંગે અપડેટ આપતાં પુષ્ટિ કરી હતી કે, "અમારા એક ખેલાડીને કમનસીબે ઇજા થઈ છે. ૨૪ કલાક બાદ જ રમાનારી આગામી મેચમાં તેનો સમાવેશ થવાની શક્યતા ખૂબ ઓછી છે, તેથી રવિવારની આખરી મેચ પ્લેઇંગ ઇલેવનમાં તમને થોડા ફેરફારો જોવા મળી શકે છે."

ઇજા પામતા પહેલા પ્રિન્સ યાદવે મેદાન પર પોતાના ટૂંકા બોલિંગ સ્પેલમાં પણ ભારે સનસનાટી મચાવી દીધી હતી. તેણે માત્ર ૮ બોલ નાખ્યા હતા જેમાં ઝિમ્બાબ્વેના ટોપ ઓર્ડરને ધ્વસ્ત કરતાં ૨ મોટી વિકેટો ઝડપી લીધી હતી. લખનૌ સુપર જાયન્ટ્સના આ સ્પીડસ્ટરે પોતાના પહેલા જ બોલે બ્રાયન બેનેટને આઉટ કર્યો હતો અને ત્યારબાદ ઝિમ્બાબ્વેના કેપ્ટન સિકંદર રઝાને પાવિલિયન ભેગો કરીને વિરોધી ટીમને મોટો ઝાટકો આપ્યો હતો.

ઉલ્લેખનીય છે કે, IPL 2026 માં લખનૌ સુપર જાયન્ટ્સ તરફથી શાનદાર પ્રદર્શન કર્યા બાદ પ્રિન્સ યાદવે ભારતીય ટીમમાં ડેબ્યૂ કર્યું હતું. આયર્લેન્ડ અને ઇંગ્લેન્ડ સામેની શ્રેણીમાં રમ્યા બાદ ઝિમ્બાબ્વે પ્રવાસ પર તે ભારતનો સૌથી અનુભવી ફાસ્ટ બોલર રહ્યો છે. હવે પ્રિન્સ યાદવ બહાર થતાં તેના સ્થાને ભારતીય ટીમ અશોક શર્માને પ્લેઇંગ-૧૧માં તક આપી શકે છે.