નવી દિલ્હી: ૧૩ સપ્ટેમ્બરથી શરૂ થઈ રહેલી અફઘાનિસ્તાન સામેની ત્રણ મેચની T20I શ્રેણી પહેલા ભારતીય ટીમને મોટો ઝટકો લાગ્યો છે. ઈજામાંથી સ્વસ્થ ન થવાને કારણે હર્ષિત રાણા અફઘાનિસ્તાન સામેની T20I શ્રેણી અને ૨૦૨૬ એશિયન ગેમ્સમાંથી બહાર થઈ ગયો છે. અફઘાનિસ્તાન T20I શ્રેણી અને એશિયન ગેમ્સ માટે હર્ષિત રાણાના સ્થાને યશ ઠાકુરની ભારતીય ટીમમાં પસંદગી કરવામાં આવી છે. ભારતીય ક્રિકેટ કંટ્રોલ બોર્ડ (BCCI) એ ગુરુવારે તેના સોશિયલ મીડિયા પ્લેટફોર્મ "X" પર આ જાહેરાત કરી. BCCI એ જણાવ્યું હતું કે, "પુરુષ પસંદગી સમિતિએ અફઘાનિસ્તાન સામેની ત્રણ મેચની T20I શ્રેણી અને ૨૦૨૬ એશિયન ગેમ્સ માટે ભારતની ટીમમાં યશ ઠાકુરનો સમાવેશ કર્યો છે."હર્ષિતને અફઘાનિસ્તાન સામેની T20I શ્રેણી માટે ટીમમાં સામેલ કરવામાં આવ્યો હતો, પરંતુ તેને પહેલા ફિટનેસ ટેસ્ટમાંથી પસાર થવું પડ્યું હતું. ભારતીય બોર્ડે જણાવ્યું હતું કે હર્ષિતને તેની ફિટનેસના આધારે અફઘાનિસ્તાન સામેની T20I શ્રેણી માટે પસંદ કરવામાં આવ્યો હતો. જોકે, ૭ સપ્ટેમ્બરે બોલિંગ કરતી વખતે તેને જાંઘના સ્નાયુઓમાં ખેંચાણનો સામનો કરવો પડ્યો હતો.BCCI એ જણાવ્યું હતું કે, "BCCI સેન્ટર ઓફ એક્સેલન્સ (CoE) ખાતે તેના પુનર્વસન દરમિયાન ઝડપી બોલર સારી રીતે પ્રગતિ કરી રહ્યો હતો. 7 સપ્ટેમ્બરના રોજ મેચ સિમ્યુલેશન દરમિયાન બોલિંગ કરતી વખતે તેને જાંઘના સ્નાયુઓમાં ખેંચાણનો સામનો કરવો પડ્યો હતો, જેના કારણે હર્ષિતને ટીમમાંથી બહાર નીકળવાની ફરજ પડી હતી."ઝિમ્બાબ્વે સામે T20 આંતરરાષ્ટ્રીય શ્રેણી દરમિયાન ડેબ્યૂ કરનાર યશ અત્યાર સુધીમાં બે મેચ રમી ચૂક્યો છે અને ચાર વિકેટ ઝડપી છે. તેના સારા પ્રદર્શન છતાં, યશને અફઘાનિસ્તાન સામે T20 શ્રેણી માટે પસંદ કરવામાં આવ્યો ન હતો. ભારતીય ટીમ 2026 એશિયન ગેમ્સ માટે પણ મજબૂત દાવેદાર દેખાઈ રહી છે. એશિયન ગેમ્સ 19 સપ્ટેમ્બરથી જાપાનના આઈચી-નાગોયામાં યોજાવાની છે. ભારતીય ટીમ ટુર્નામેન્ટમાં તેની પહેલી મેચ 28 સપ્ટેમ્બરના રોજ ક્વાર્ટર ફાઇનલમાં રમશે.