રાજકોટ, તા.૨૨: ઓસ્ટ્રેલિયાના દિગ્ગજ અને વિસ્ફોટક પૂર્વ ઓપનિંગ બેટ્સમેન ડેવિડ વોર્નરે (David Warner) પોતાના પર લાગેલા દારૂ પીને ગાડી ચલાવવાના (Drink and Drive) ગંભીર આરોપો અદાલત સમક્ષ સ્વીકારી લીધા છે. એપ્રિલ મહિનામાં સિડની ખાતે પોલીસ ચેકિંગ દરમિયાન પકડાયેલા ૩૯ વર્ષીય વોર્નરે પોતાના વકીલ બોબી હિલ મારફતે વેવરલી લોકલ કોર્ટમાં પોતાની ભૂલ અને ગુનો કબૂલ્યો હતો. આ મામલે કોર્ટ દ્વારા હવે આગામી ૧૮ ઓગસ્ટના રોજ સજા સંભળાવવામાં આવશે.
કાયદાકીય મર્યાદા કરતા બમણો દારૂ પીધો હતો
આ ઘટના ગત ૫ એપ્રિલના રોજ સિડનીમાં બની હતી. રોડસાઈડ ચેકિંગ દરમિયાન પોલીસે વોર્નરની કાર રોકીને રેન્ડમ આલ્કોહોલ ટેસ્ટ કર્યો હતો, જેમાં પરિણામ પોઝિટિવ આવ્યું હતું. ત્યારબાદ પોલીસ સ્ટેશનમાં લેવાયેલા સેકન્ડરી ટેસ્ટમાં સામે આવ્યું હતું કે વોર્નરના શરીરમાં કાયદેસરની મર્યાદા કરતાં બમણાથી પણ વધુ દારૂનું પ્રમાણ હતું.
કોર્ટમાં વોર્નરના વકીલ બોબી હિલે પક્ષ રાખતા કહ્યું હતું કે, "વોર્નર સારી રીતે જાણે છે કે તેણે જે કર્યું તે ભારે ભૂલ હતી. ઉબેર કે ટેક્સી ટેક્સી બુક કરવાના 'પ્લાન B' ને બદલે પોતે જ કાર ચલાવવાનો 'મૂર્ખ પ્લાન A' પસંદ કરવો એ તેની બિનજવાબદાર ક્ષણ હતી. ઈસ્ટરના તહેવાર પર વાઈનનો ગ્લાસ પીવો એ ગુનો નથી, પરંતુ પીધા પછી કાર ચલાવવાનો નિર્ણય જ તેની સૌથી મોટી ભૂલ હતી."
બિગ બેશ લીગમાં કપ્તાની છીનવાઈ જવાનો મોટો ખતરો
આ કાનૂની મુશ્કેલીને કારણે વોર્નરની ક્રિકેટ કારકિર્દી પર ફરી એકવાર કાળા વાદળો ઘેરાયા છે. બિગ બેશ લીગ (BBL) ની ફ્રેન્ચાઈઝી સિડની થંડર (Sydney Thunder) માં વોર્નરની કપ્તાની હવે ભારે શંકાના દાયરામાં આવી ગઈ છે. સૌથી મોટી વિડંબના એ છે કે સિડની થંડર, સિડની સિક્સર્સ અને ન્યૂ સાઉથ વેલ્સ બ્લૂઝ પોતે જ રાજ્ય સરકારના 'ડ્રિંક એન્ડ ડ્રાઈવ વિરોધી' જાગૃતિ અભિયાનના સત્તાવાર ભાગીદાર છે!
ક્રિકેટ બોર્ડે વ્યક્ત કરી આકરી ચિંતા
ક્રિકેટ ન્યૂ સાઉથ વેલ્સના ચીફ એક્ઝિક્યુટિવ લી જર્મોને આ ઘટના અંગે ભારે ચિંતા વ્યક્ત કરતા જણાવ્યું હતું કે, "આ આરોપો અત્યંત ગંભીર છે અને અમે તેને હળવાશથી લઈ શકીએ નહીં. અમે સેફ ડ્રાઈવિંગના હિમાયતી છીએ." તેમણે વધુમાં સંકેત આપ્યો હતો કે સજાની જાહેરાત બાદ સિડની થંડરના કેપ્ટન તરીકે વોર્નરનું ભવિષ્ય જોખમમાં મુકાઈ શકે છે.
મુખ્ય વિગતો (Quick Highlights):
•    આરોપી: ડેવિડ વોર્નર (ઉંમર ૩૯ વર્ષ, પૂર્વ ઓસ્ટ્રેલિયન ક્રિકેટર).
•    ઘટનાની તારીખ: ૫ એપ્રિલ (સિડની, ઓસ્ટ્રેલિયા).
•    સજાની તારીખ: ૧૮ ઓગસ્ટ (વેવરલી લોકલ કોર્ટ).
•    સંભવિત પરિણામ: ભારે દંડ, ડ્રાઈવિંગ લાયસન્સ રદ થવું અને BBL કપ્તાની પરથી બરતરફી.