નાગોયા : જાપાનના નાગોયા ખાતે રમાઈ રહેલી એશિયન ગેમ્સ ૨૦૨૬ (Asian Games 2026) માં ભારતીય રમતવીરોનું શાનદાર પ્રદર્શન યથાવત છે. ભારતની સ્ટાર વુશુ ખેલાડી નાઓરેમ રોશિબીના દેવીએ (Naorem Roshibina Devi) મહિલાઓની ૬૦ કિગ્રા વુશુ સાન્ડા (Wushu Sanda) સ્પર્ધાની ફાઇનલમાં ધમાકેદાર પ્રવેશ કરીને દેશ માટે વધુ એક સિલ્વર મેડલ પાક્કો કરી લીધો છે. આ સાથે જ રોશિબીનાએ એશિયન ગેમ્સની સતત ત્રીજી આવૃત્તિમાં મેડલ જીતીને એક નવો ઈતિહાસ રચ્યો છે.

 

સેમીફાઇનલમાં ઇન્ડોનેશિયાની હરીફને ધૂળ ચાટતી કરી

બુધવારે યોજાયેલી હાઈ-વોલ્ટેજ સેમીફાઇનલ મેચમાં રોશિબીનાએ પોતાની આક્રમક રમતથી ઇન્ડોનેશિયાની કુસુમાનિંગત્યાસ થાનિયાને એકતરફી મુકાબલામાં ૨-૦ થી પરાજય આપ્યો હતો. આ વિજય સાથે જ રોશિબીનાએ ફાઇનલમાં સ્થાન બનાવી ગોલ્ડ મેડલ માટેની પોતાની દાવેદારી મજબૂત કરી લીધી છે.

 

રોશિબીના દેવીની આ અગાઉની એશિયન ગેમ્સ સફર:

 

• ૨૦૧૮ જકાર્તા ગેમ્સ: બ્રોન્ઝ મેડલ

 

• ૨૦૨૩ હાંગઝોઉ ગેમ્સ: સિલ્વર મેડલ (૬૦ કિગ્રા વર્ગ)

 

• ૨૦૨૬ નાગોયા ગેમ્સ: સિલ્વર પાક્કો (ગોલ્ડ માટે દાવેદારી)

 

વિવાદોથી પર થઈને આપ્યો સણસણતો જવાબ

આ ટુર્નામેન્ટ અગાઉ વુશુ ટીમની પસંદગી અંગે વિવાદ ઉભો થયો હતો. શરૂઆતમાં ટ્રાયલ્સમાં ચોથા સ્થાને રહેલી રોશિબીનાને ઈજાગ્રસ્ત દિવ્યાંશી ચૌધરીના સ્થાને ટીમમાં સામેલ કરાઈ હતી. જોકે, પસંદગી પર ઉઠેલા તમામ સવાલોનો રોશિબીનાએ મેદાન પર પોતાના શાનદાર પ્રદર્શન અને જીત દ્વારા સણસણતો જવાબ આપ્યો છે.

 

વુશુમાં અન્ય ભારતીય ખેલાડીઓનું પ્રદર્શન

જ્યાં એકતરફ રોશિબીનાએ દેશનું નામ રોશન કર્યું છે, ત્યાં પુરુષોના ૫૬ કિગ્રા વર્ગમાં ભારતનો આર્યન ક્વાર્ટર ફાઇનલમાં ઉઝબેકિસ્તાનના સૈદુલો અબ્દુરાશિતોવ સામે ૧-૨ થી હારીને બહાર થઈ ગયો હતો. તે સિવાય મહિલાઓની 'નાનક્વાન અને નાન્દાઓ' ફાઇનલમાં હંજબામ લેંગલેન્ટોમ્બી દેવી ૧૮.૮૩૯ ના સ્કોર સાથે ૯મા સ્થાને રહી હતી.

 

હવે સમગ્ર દેશની નજરો રોશિબીના દેવીની ફાઇનલ મેચ પર ટકેલી છે, જ્યાં તે પોતાના આ મેડલને ગોલ્ડમાં બદલવા માટે રિંગમાં ઉતરશે.