​ નાગોયા: જાપાનના આઇચી-નાગોયા ખાતે યોજાઈ રહેલા એશિયન ગેમ્સ ૨૦૨૬માં ભારતીય ખેલાડીઓએ પોતાના શાનદાર પ્રદર્શનથી મેડલ તાલિકામાં સ્થિતિ મજબૂત કરી છે. ભારતીય ટુકડીએ અત્યાર સુધીમાં ૪ ગોલ્ડ, ૧૨ સિલ્વર અને ૧૪ બ્રોન્ઝ સહિત કુલ ૩૦ પદકો મેળવીને મેડલ ટેલીમાં ૧૦મું સ્થાન જાળવી રાખ્યું છે. સ્પર્ધાના મહત્વના તબક્કામાં સ્કવૉશ, બોક્સિંગ, તીરંદાજી અને વોલીબોલમાં ભારત માટે સકારાત્મક પરિણામો આવ્યા છે, જ્યારે બેડમિન્ટન, વેટલિફ્ટિંગ અને સેપક ટકરામાં નિરાશા અનુભવવી પડી છે.

​સ્કવૉશમાં અભય સિંહ અને અનાહત સિંહે જીત્યો રજત પદક

સ્કવૉશની રમતમાં ભારત માટે ઐતિહાસિક ક્ષણ રહી હતી. મેન્સ સિંગલ્સના ફાઇનલ મુકાબલામાં ભારતના અભય સિંહનો સામનો મલેશિયાના ઇવાન યો સામે થયો હતો. ફાઇનલમાં મલેશિયાઈ ખેલાડીએ ૩-૦થી માત આપતાં અભય સિંહ ગોલ્ડ મેડલથી વંચિત રહ્યા હતા અને સિલ્વર મેડલથી સંતોષ માનવો પડ્યો હતો. તેવી જ રીતે વિમેન્સ સિંગલ્સ ફાઇનલમાં ભારતની ઉભરતી ખેલાડી અનાહત સિંહ પણ મલેશિયાની શક્તિશાળી ખેલાડી શિવાસંગારી સુબ્રમણ્યમ સામે ૩-૦થી હારી જતાં સિલ્વર મેડલ પોતાના નામે કર્યો હતો.

​બોક્સિંગમાં પરવીને મેડલ પાક્કો કર્યો, વોલીબોલ અને તીરંદાજીમાં ભારતનો દબદબો

મહિલા મુક્કેબાજીના ૬૫ કિલોગ્રામ ભારવર્ગની ક્વાર્ટર ફાઇનલમાં ભારતની પરવીને ઉઝબેકિસ્તાનની નાવબાખોર ખમીદોવાને ૫-૦થી એકતરફી માત આપીને સેમિફાઇનલમાં પ્રવેશ કરી લીધો છે. આ જીત સાથે પરવીને ભારત માટે ઓછામાં ઓછો બ્રોન્ઝ મેડલ પાક્કો કરી લીધો છે. આ ઉપરાંત, પુરુષ વોલીબોલ ટીમે પોતાના અભિયાનની આક્રમક શરૂઆત કરતાં વિયેતનામને ૩-૦થી પરાજય આપ્યો હતો. તીરંદાજી રિકર્વ સ્પર્ધામાં પણ ભારતે પોતાનું પ્રભુત્વ જાળવી રાખ્યું છે, જેમાં પુરુષ ટીમે ચીનને ૫-૧થી અને મહિલા ટીમે ચાઇનીઝ તાઇપેઇને ૬-૦થી હરાવીને સેમિફાઇનલમાં સ્થાન નિશ્ચિત કર્યું છે.

​પી. વી. સિંધુ, મનુ ભાકર અને હરજિંદર કૌરને નિરાશા સાંપડી

બીજી તરફ, બેડમિન્ટનમાં ભારત માટે આંચકારૂપ પરિણામો આવ્યા છે. બે વખતની ઓલિમ્પિક પદક વિજેતા સ્ટાર ખેલાડી પી. વી. સિંધુ મહિલા સિંગલ્સના ક્વાર્ટર ફાઇનલમાં વિશ્વની ૪થા નંબરની ખેલાડી ચેન યુ ફેઇ સામે ૨૧-૧૧, ૧૮-૨૧, ૧૦-૨૧થી પરાજિત થઈ બહાર થઈ ગઈ હતી. આ પૂર્વે ઉન્નતિ હુડ્ડા પણ જાપાનની અકાને યામાગુચી સામે કડક ટક્કર બાદ હારી જતાં બેડમિન્ટન સિંગલ્સમાં ભારતની આશા અંત પામી છે. શૂટિંગમાં મહિલા ૨૫ મીટર પિસ્તોલ ઇવેન્ટમાં ઇશા સિંહે ૨૯૦ના સ્કોર સાથે ૬ઠ્ઠું સ્થાન મેળવ્યું હતું, જ્યારે મનુ ભાકર અને રાહી સરનોબત ૨૮૭ના સ્કોર સાથે સંયુક્ત રીતે ૧૬મા સ્થાને રહ્યા હતા. વેટલિફ્ટિંગમાં મહિલાઓના ૬૯ કિલોગ્રામ વર્ગમાં હરજિંદર કૌર માત્ર ૨૦૪ કિલો (સ્નેચ ૯૪ અને ક્લીન એન્ડ જર્ક ૧૧૦) વજન ઉંચકીને ૯મા ક્રમે રહી સ્પર્ધામાંથી બહાર થઈ હતી. સેપક ટકરામાં ભારતીય મહિલા ડબલ્સ ટીમને ફિલિપાઇન્સ સામે ૨-૦થી હારનો સામનો કરવો પડ્યો હતો.